RUIHHLO HMANGIN MIN VAW LET

Kum tam tehchiam lo, liam tawh ah khan ‘Spasmo Proxyvon’ Pum damdawi (pumna chhawkna) ei chi chu kan thalai za tel teh meuh chuan Injection-a ruihhlo nawmchen nan an hmang a nih kha. He Damdawi chimawm zet mai hi kan chenna State thlang lawk Assam State atanga an rawn thawn chhoh VAI siam a ni. Khang hunlai khan Aizawl khawpui leh a chhehvel chu kan buai hle awm e. Kum tam pawh a vei hmain chung Proxyvon nawmchen nan a hmang thin te chuan harsatna an tawk ta vat a. An addict in, ruk ruk an ching zui nghal a, Aizawl khawpui veng tinah thilbo inrawk a hluar nghal a nih kha. (Keini hnam/State aia hnufual zawk hnam/State tam tak te hian proxyvon ruihhlo atan a hmang an awm hriat a ni lo)

Khawtin vengtin YMA,JAC,VDP te a tibuai tak zet a, chhiatni thatni sawiloh Biak In chhung thlengin min zar buai a. He damdawi nawmchen nan a an hman âtthlak tak mai chuan an taksaah hnu hma an nei tak tak mai chu atha lo hle in a mualpho thlakin a vanduaithlak hle a ni. Kumtam pawh a inher hman meuh lo, heng addict te hian natna hlauhawm tak tak an inkai chhawn bakah an ban /bawp/ke te chu injection-na vang ani tih hriat ngawih ngawih in an vung ber bur a nih kha. Reilote-ah ban tan, Ke tan in a zui bawk bakah Overdose leh he damdawi ina a khawipawi luat avanga natna hrang hrang vangte in kan thalai tam tak kan chan a ni. A dam chhuak awm chhun te pawh (ramtuileilo-ah) hna thawk tlaklo leh ruihhlo engemaw tal khawih ngaiin a hnutchhia a ni. (Kan ram administration fuh tawk lo, kan mithiam te mitvai leh bengthlep, Law & Order inthlah dah vang leh kan taimak tawk loh avanga nawmchenna zawn luat vang, riina kawnga intlansiak nasat vang leh ram siamfel tum silova politic-a chungnung ber nih tumna khelh nasat lutuk luat vang a ni)

Enghun emaw lai khan he damdawi rapthlak tak mai chu YMA te an hnawt bo ta duak maia, Proxyvon addict la awm chhun te chuan an mahni inenkawl nan Parvon Spas an ei thin a ni. Parvon tak ngial pawh um bo ani zui nghal a. Chutia, Damdawi tihbaiawm tak YMA ten an umbo engthawl lai tak leh Kohhran hrang hrang ten Pathian thu nen a tih tak meuh meuh a an enkawl lai tak chuan., Khawvel hmun hrang hranga ram changkang zawk ten ralpui phiar a an lo phiar thin “ruihhlo rapthlak” zet a hming kan hriat bel em em, mahse mita kan la hmuh ve miah lo leh tawn hriat nei pawh la tam vak lo ruihhlo hlauh awm tak “drugs No. 4” chu kan ramah man tlawm tein a rawn lut ta zut zut mai le. Proxyvon/Parvon tih te chu a khuhhneh rem rem e. He damdawi zet hi chuan chhungkua hausa leh rethei a thliar ve hauh lo. Lekhathiam leh thiamlo pawh inangkhat vekin a hrut rual e ti mai ang. No. 4 addict kan punghluaia chutihlai chuan ruk ruk, inrawk, tual inthahna, chhungkua buaina case chi hrang hrang leh he damdawi veka sum dawng an pung hluai a.

He mi hian a kentel chhe tin reng mai ‘KHEH PUAM’ leh damdawi tha lo tak tak te chuan Aizawl leh a chheh vel atuam nghet tlat a. (Kan Sorkar hnathawk thenkhat leh Politician lian te(eiruk nasat vang)zak hauhlova an hlawh phu lova in leh lo tha tak an neih thut te, ram awl a piang leh Sorkar ram inpek politic duhamna te, leh heng ho hi thika kut tlinglo a sumdawnna leh hausak thutna um luat tam vangte, kan thalaite kan vei loh avanga ruihhlo buka tang nasat vang te, hnam dang sumdawngte khuakhirh that tawk loh vang te in heng thil hi alo thleng a ni.) Hei zet hi chu a huathlala awm tak zet a ni. Kan khawchhak …. unaute unaute..ti zut zut tute khan intuar ve em!! Tun thleng hian thalai sim thei tawh lo an tamin, kawmkam leh mivaranda vel ah te Kawngpui kawng ual au tak takah te an thu hnêk hnûk a, lirthei khal chung pawhin an in pe in an in hlan zung zung ta anih hi. He ruihhlo No 4 ah hian kan tawp dawn nge? kan bei/do zêl dawn le?. Hei bâkah Mizo te Kristian kan nih hnu atanga tun thlenga kan DO Rawn – ZU pawh a rem thei ta lo a ni. Engpawh nise, YMA chuan Ruihhlo a Do zel dawn tih hi i hre mawlh ang u. Thangthar lo piang leh zel turte hnenah Ruihhlo that lohzia uar takin i fah zel ang u.

Leave a Reply