SAVA KA NGAIDAM

– Ramhmangaiha,
Hnamchhantu

Niminah air gun mu thahnem tak nen ka buh veng tûrin ka kal. Sava te tak te tè tè ten an lo tlan, pit rual an. Hetiang hian chawlhkar hnih an tlan tawh. Chu chu veg tûrin ka airgun ( ka thianpa PL-a) min hawh tir nen chuan ka in pu liam ve. Sava chu chhiar ila 50 atanga 100 inkar vel an ni thei mai awmin ka hmu. Tichuan ka buh eitu sava chu ka han kap ta a. Mak takin vate pakhat chu a lu takah ka kap fu mial a. Kan inkar hi feet 25 atanga feet 30 vel a ni thei mai awm e. Ka kahna atang chuan kut zungpui tia vêlin a lang.

Sava chu ka chhara ka han en chian chuan a tê hlê mai tih ka hmu a. A irte ka han hmet vela, buh hum kha a kâah barhin a pumah thun ila. A kareh, a hmui thlengin rem ila, buhum fang 10 kan rem theih chuan a puar fé ang. Tichian ka ngaihtuah zui ta viau mai a.

An vai chuan man khawm ila, an buh hmuam lai zawng zawng chu chhuatah zut chhiakin dah khawm ila. Vate rual 100 bawr chuan dut no khat pawh an hmuamin ka ring ta lo va.

Khuain a zir chuan ka buhi hi ni 5 hnuah chuan ka ât tawh mai dawn a. Heng vaté te hian nitin dut no khat pawh chu lo ei se, dut no 5 vel min ei sak dawn tihna a ni. Chu chu buhfaiah chantirin a favai chu paih ta ila, buhfai hlang dut no 4 vel chu ka chân dawn niin a lang. Dut no 4 chu bazar rate-in han chhut ila a tam berah Rs 20/- pawh a man awm lo ve.

Ka sava kah chu ka han en nawn leh a. Ka khawngaih ta em em a. A hrawka buh hum chu fang thum emaw lek tûr a ni awm e. Chu chu a thihpui ta a nih chu.Ka zakin ka inchhir ta em em a. Sava vêng tûr pawhin chakna ka nei zo ta lo. Tichuan Pathian hnenah ngaihdam dilin tun ni 5 chhung chu a thei theiin lo tlan se, …tiin sava té te chu ka ngaidam ta a. Ka tihsual chuan min tih khawbaw sak mai pawh a ni thei. Mahse ti hian ka ngaihtuah- lo ei kawlh vek pawh ni se, kum 60 ka lo liam ve ta, sava te hi engtik lai mahin chaw ka la pe lo, chuti chungin min tihlim tûrin ka beisei fo. Chuvangin tum khat na reng reng chu ka buh te hian ruai lo theh ve poh teh se tiin ka thlah thlam ta.

Ka tihsual berah pawh kum 60 chhungin kum khat hlo thlawh tha ka seng thlawn tihna chauh a ni. Sava tê tak tê tê te u, thlamuang takin Ramhmangaiha buh chu lo ei phawt teh u.

Leave a Reply