SEX, ABC LEH AIDS

– Dr Eric Zomawia (Project Director, MSACS)

Khawvel pumah, India ram leh Mizoram ngeiah pawh HIV/AIDS inkai darhna tam ber chu mipat hmeichhiatna(sex) a ni. Sex hman avanga HIV kai leh thehdarh tur pumpelhna tura ‘ABC approach’ an tih mai hi 1990 vela Botswana sorkarin a hman atangin UNAIDS leh khawvel sorkar hrang hrangin an campaign au hlaah an hmang chho ta zel a, India pawhin kan hmang ve ta a ni.

ABC chu eng?
A= Abstain. (Abstinence = fihlimna, insumna).
Hei hi a bik takin thalai- nupui pasal la neilote leh pawmlai nei lo te’n an zawm ngei tur a ni. Nupui/pasal neih hmaa sex hman miah loh hi a him ber a, atha ber a, a Kristian hle.|halai tam tak inngaihna sualah tlu in HIV/AIDS, Hepatitis, VD, sawn pai etc avangin an future an ti chhe vek meka nih hi. Kohhran, khawtlang, nu leh pa, zirtirtute helam kawngah hian nasa taka kantan a ngai.

B= Be faithful. Rinawm rawh. (Faithful=Rinawm).
Pathianin sex hi nupa inkara hman atan a tih a ni a. Nupui pasal nei tawhte chu an kawppuite lakah an rinawm tawn ve ve tur a ni a, tumah dang sex an hmanpui tur a ni lo. Hemi tlin lo te hian nasa takin AIDS an thehdarh mek a, an nupui pawisawi lo te mai bakah an fate an kai chhawng nasa hle.

C = Correct and Consistent use of Condom.(Condom a hman dan tur dik taka hman ziah).
A chunga A leh B te hi tha ber, duhthusam, him ber anni. Mahse A leh B tlinlo te tan chuan AIDS laka invenna kawng khat chiah a la awm a, chu chu Condoms a ni. Condoms hi za a za (100%)-in a him lo thei a, a hman dan dik taka hman ziah a ngai a, tet palh, dawk palh thei a ni a: chutichung chuan, A leh B te tlin lo tan chuan hman ngei ngei tur a ni. Nupa inkar ni si lo, condoms tel bawk si lova sex hman hi thil hlauawm lutuk (high risk behaviour) a ni a, tunlai khawvelah chuan chin ngam chi a ni tawh lo.

Condoms hi duhthusam leh tha ber chu a ni lo, a aia tha chu insumtheihna a ni. Chutih rual chuan Condoms hi a hnualsuat theih loh, a chhan chu insumthei lo kan tam lutuk vang a ni. ‘A’ leh ‘B’ hi nungchanga innghat pumhlum a ni a, ‘C’- Condoms chauh hi sex atanga HIV pumpelhna hmanrua khawih theih, sem theih, lei theih awm chhun a ni. ‘A’ leh ‘B’ hi Primary Prevention – ti lo tawp tura inzirtirna a ni a, ‘C’ hi ‘Harm reduction’ – thil tha lo tawh sa thil dang tha lo leh zualin a belh chhah loh nana tih a ni. ‘A’ leh ‘B’ hi duhthusam, tha ber a ni a, ‘C’ hi duhthusam tlin lote’n an hman tur a ni.

Mizorama HIV darhna tam ber chu sex a ni. March 2010 thlenga thisen test tawh 102,974 zingah 4381 HIV hrik pai hmuhchhuah tawh an ni a, chung zing a 62.67% chu sex atanga kai an ni. 2009 chhung ringawt khan 1110 HIV pai hmuhchhuah zingah (72.6%) chu sex atanga kai an ni. Chumi awmzia chu nupa inkar ni si lova, condoms tel lova sex hmang kan la tam hle tihna a ni. Duhthusamah chuan KS te awm lo se, tuma’n dawr lo se, sex hmansualna te hi awm lo se, Mizo nula leh tlangvalte hian an thianghlimnate vawnghim vek se, nupa zawng zawng rinawm se, nau tih tlak, sawnpai awm lo se, inneih dan puitling tlin vek ila, condoms tuma’n mamawh lo ila – chu chu kan tum tur a ni reng a, theihtawp pawh kan chhuah zel ang.
Mahse chu duhthusam kan tlin hma rih si chuan Condoms hi kan thlauhthla thei tlat lo. Condoms tello chuan rei loteah kan hnam pum hi kan mang thei tak ngial dawnin a hriat a ni. Condoms hi tunhma chuan chhangkhat nan hman a ni thin a, tunah chuan nunna chhan nan hman a ni ta a ni. AIDS mai bakah Hepatitis B, Hepatitis C, Syphilis, Gonorhheoa, Herpes. etc lakah a veng thei.

Tunlaiin thalai zingah I-Pill (rai lohna damdawi) ei thin an tam an ti a, a pawi khawp mai. AIDS aiin rai palh kan hlau ta zawk em ni? He damdawi hian rai palh veng mah se HIV lakah a veng thei lo. Condoms erawh chuan a veng thei ve ve a ni. Condoms hian sex a ti hluar a, thalaite zinga sawi mawi hi a tha lo tia sawi an awm kan hre thin. A dikna chin pawh a awm ang. Kan hriat tur chu Condoms chu A leh B tlin lo te tan chauh a ni kan sawi thin. |halai sex hmansualna laka fihlimte tana tih a ni lo. Mahse, rin loh tak tak hi an chesual si zawng a nih hi. Mithiamte’n an zirchianna tam taka an hmuhchhuah chu condoms awm avang ringawtin sex a hluar phah chuang lo tih hi a ni.

Engtinnge kan tan ve ang?
Kan ramah HIV-in bu a khuar hneh tawh lutuk a, inhnial buai hman kan ni tawh lo. Mahni hma zawn theuhvah kan tan tlan a ngai a, Mizo mipui natna a ni a, MSACS sum lo chuan AIDS do thei lo anga inngaih tlat a hun tawh lo. MSACS ringawt chuan tih theih kan nei tlem lutuk. Hengah te hian Khawtlang, Kohhran, Chhungkua ang tein tan inla tlang leh sauh sauh teh ang u.

1. Tleirawl leh thalaite inneih hmaa sex hmang lova, thianghlimna vawng tlat turin uar takin zirtir ila, Kristian thalai condoms mamawh lo tam thei ang ber I chherchhuak teh ang u khai.

2. Sex hman khawlohnain rilru hrehawmna, natna hrang hrang –HIV, Hepatitis B & C, serh leh zun kawng natna hrang hrang (sexually transmitted infections) bakah sawnpai leh nau tihtlak te a thlen thin zia leh future tihchhiat vekna a nih zia inzir uar ang u.

3. Thalaite sex-a hruai luttu- zu leh ruihtheih thil dang, film tha lo. etc I do tlat zel ang u.

4. KS-te leh sex lama insum thei lote’n nun kawng pangngai an zawh theih nan hma I la sauh sauh ang u.

5. Thalaite an tui zawng hmangin an nunkawng a tha zawnga inkaihhruai dan ngaihtuah zel ila; helama thiam bik kan zingah i chher chhuak zel ang u.

6. Nu leh pate’n kan fate kan enkawl danah kan tan a ngai hle. Inah kan uap tlem lutuk a, kan thlah thlam lutuk a, entawn tlakin kan nung bawk thin lova. Tleirawl zan vak, drugs leh sex-a tlu lut an tam a, I fimkhur hle ang u. Inchhirin ban a pel ang e.

7. MSACS leh NGO te’n Nunkawng zawh fuh tawh lo lak lawhte tan hmalakna hrang hrang- Drop In Centres, ICTC, Art Centres etc an neihte zir chiang ila, sawisel ngawt lovin khawtlang te’n support hram hram ila. Kan unaute ngei, kan tih hleihtheih tawh lohte zingah hma an la a ni a, a harsa em em a; mit tlun loh chang deuhte pawh a awm a nih pawhin, kan khawtlangah AIDS a darh zel loh nan an hmalakna a pawimawh si a, rilru zau tak pu chungin thlawp zel turin kan inngen bawk a ni.

A tawp nan chuan HIV/AIDS kan ram min run mektu hi kan tanrual loh chuan engtikah mah kan hneh ngai dawn loh avangin mahni zawnah theuh theihtawp i chhuah tlang tak tak theuh ang u.

Leave a Reply