State Librarian’s Day vawi-8 Na Hman A Ni

Ni 12 August, 2019 Thawhtanni khan India ram puipuiah ‘State Librarian’s Day’ hman a ni. Ni 12 August hi Father of Library Science Dr. S.R. Ranganathan (1892-1972) piancham a ni a, hemi hriatreng nan he ni hi National Librarian’s Day a puan a ni. State Librarian‘s Day hi vawi – 8 zet hmanna a ni. Mizoram State Library Department hnuaia NGO Recognised zawng zawngte chu hemi ni hian mahni awmna veng Branch theuhah Librarian’s Day hi lo hmang theuh tura tih a ni.

Hun chep tak karah keini veng Branch YMA pawh hemi ni hian Library hawn ve a ni a, Librarian’s Day Observe dan tur, inkaihhruaina (guidelines) siam ang diak diak chuan kan hmang ve thei ta lo a ni.

Librarian’s Day hi Mizoram State Library, Art & Culture Department buatsaihin State Central Library Reading Hall, New Secretariat Complex, Aizawl-ah hman a ni a. Thupuiah, “A good book has no Ending – Knowledge for all” tih hman a ni. Hetah hian Art & Culture Director, Secretary te bakah Synod Hospital Librarian, State Librarian te leh Mizoram Upa Pawl(MUP), Mizo Hmeichhe Insuihkhawm Pawl (MHIP), Mizo Academy of Letters (MAL) aiawhte bakah School naupang te’n Dr. S.R. Ranganathan hriatrengna hun hi an hmang ho a ni.

Mizoram Public Library hmasa ber anga kan neih Sub-Divisional Library hi 1969 kha Sikulpuikawn-ah din a ni a, Mizoram State Libray, State Central Library tia hriat bawk hi 1974 ah din a ni thung.

Mizoram General Knowledge 3rd Edition, 2007 in a tarlan dan in Mizoram-ah Libraries 471 a awm. Aizawl District – 164, Champhai- 85, Kolasib – 27, Lawngtlai – 6, Lunglei -54, Mamit – 32, Saiha – 7, Ser-chhip – 43. Kum 2019-ah hi chuan engangchiah in nge Library hi a pun ang le. Hma kan sawn tak zet zet a ni.

Kan Branch YMA chuan Library changtlung tak a nei ve a, Inrinni tin a hawn thin niin Library room-ah hian Lekhabu hawh turte lo tanpui tur duty detailment felfai tak siam a ni. Kum tin Library member lak ve thin a ni. A bik takin naupang lam in Library an hlut em em a, a lawmawm tak zet a ni. Puitling lam pawh hian Library-a lehkhabu hawh uar sauh sauh turin kan insawm a ni. Member mai nih duh tawk lovin Lehkhabu chhiar intih hmuh turin chhungtin te kan in ngen mawl mawlh a ni.

Leave a Reply