TAITE HUANG

Heile Krismas chu….

Kan lo thleng leh ta reng mai! Kumtir atanga vawiin tluang taka min hruai thlengtu Pathian chungah mi tin hian lawmthu sawi tur kan nei theuh ngei ang. Kum bul lamah te, kum laihâwlah te, kum tâwp lamah te mimal emaw chhûngkua emawin harsatna leh hun hreawm tawn lai kan nei mai thei a, lusûn leh natna mangan thlâk tak tuar pawh kan awm ngei bawk ang. Mahse, he thu chhiartute erawh chuan hêng zawng zawng paltlang hian kumin 2010 Krismas chu kan thleng ta hrim hrim mai a, hei vang ringawt pawh hian lâwm tur chu kan ni.

Krismas hi mihringte Pathian laka kan pianna hun, hun pawimawh vâwrtâwp a ni tih kan ngaihtuah ngai em le? Lal Isua piancham a ni mai lo; Pathian laka mi sual—mihringte kan pian hun a ni mah mah zâwk. Lal Isua pianchamah ngawt kan ngai a nih chuan kan hre thelh hle tihna a ni.

Pathianin kan tân a fapa Lal Isua min pêkna hun champha phâk a ni a, chuvang chuan he hun hi ‘thilpêk hun’ a ni a tih theih. Kan Branch YMA chuan Nursery Aw chhuak hmasa leh tun tum chhuaka târlan ang hian vêngchhung chhungkaw 17 ngawt Krismas Thilpêk a pe a. Kum dangah pawh heti lam hawi hian a che ve tawh thin nain kumin hi Branch YMA hminga Krismas thilpêk inpêk thathnem ber a la ni hial ang. Heti chung hian duh angin YMA pawh hi a la che nasa lo deuh fo—rethei leh pachhia te chhawmdâwlna lamah hei ai hian la kal uar zâwk se a tha hle ang.

Tual chhûng chanchinbu thenkhat atangin mi chanhai leh hnuchham enkawlna hmuna tanpuina thilpek inpek a nih thu kan hre fur a. Kan veng chhungah hian kan hre sual a nih loh chuan mi malin chanhai leh rethei zâwkte tanpuina inpe kan hre lo hle mai (a ruka inpe an lo awm a nih loh chuan). Hei vang hian Krismas hi a nihna leh a chhan tak thelh hretin vawiin thleng hian kan la hmang fo niin a lang. Mi dang tâna inpe si lovin ‘a huau huau leh hlimhlawp zâwng chiahin kan hmang’ fo mai hi Pathian duhzâwng a nih a rinawm loh.

Kumin phei chu Zawlaidi lâr kum a ni a, kumtluana nunchang tha tak tak, sawisêlbo tak tak thalai engemaw zât chuan he tuiril tê hi kan sernung min la siamsaktu tur bultannaah kan hmang palh ang tih a hlauhawm hle. Hawh u, fimkhur leh uluk takin kumin Krismas leh Kumthar vuatvet hi hmang ang u.

Leave a Reply