TAITEA HUANG

Aizawl Khawpui chhung mai nilo, Mizoram hmun hrang hrang han thlir hian Nursery Veng hi Assets/Infrastructure (Hall, Field, Motor kawngpui, Bazar, Step, Side-drain, etc) neih kawngah veng mipui tamlam a tehin a hnufum ber pawl kan ni hial awm e.

Heng kawnga kan hnufumna chhan chhuanlam zinga lian ber pakhat chu veng naupang kan la nih vang niin sawi a awm fo. Nguntaka ngaihtuah chuan kan veng aia upa bik lo leh veng naupang zawk mah ni si te zingah nasataka kan phak loh hi sawi tur an awm thluahin a rinawm.

Kan veng VC leh NGO hrang hrang hruaitu lo ni tawh leh la ni mekte hi vengin hma kan sawn theih lohna chhan pakhatah puh ta ila, a dikna chen a awm thei ang. Hruaitu an nih miau avangin mipui lamin an lakah beisei kan lo ti sang deuh anih pawhin a awm tho mai. Chutih rualin kan vengchhung a pawl hrang hrang hruaitute hi veng mipui, an mahni thlangtute ngei hian kum 10 emaw lek chhung hian vawi duailo kan lo thlak kual tawh a, eng teh ual erawh chu kan la nih phah lo niin a lang. Chuti anih si chuan hmasawnna kawnga kan hnufum chhanah hruaitute puh vek mai chu a dik tawk lo niin a lang.

Mi veng dinhmun kan thlir changin rualawh a na thin si a, hmasawnna kawng dik zawh turin vengchhunga pawl hrang hrang hruaitute mai tan thil tih theih anih bawk siloh chuan, kan zavaia kan tan tlan a ngai a ni tih hi kan hriat a pawimawh hle. Vengchhungah hnasang a ni emaw hna hniam deuh a ni emaw Sawrkar Department hrang hranga thawk kan awm ve thluah a. Heng mite hian kan thawhna theuhah kan veng hmasawnna atana thil dil chi a awm leh awm loh te mitmei na chang hria ila, chutiang ang thil te kan thawhna Department-ah a lo awm anih phei chuan kan hruaitute bengvarna chang hriain hmalak zuina kawngah pawh theihtawp chhuah tlang dial dial ila chuan engemaw kawng zawng tal chuan hma kan sawn phah ngei ngeiin a rinawm tlat a ni.

Vengin hma kan sawn theihnana kan phak ang tawk theuh a tan la thar turin Taitea hian mitin, a te ber atanga a lian ber thlengin a sawm mawlh mawlh che u a ni.

Leave a Reply