TAITEA HUANG

Mitin tana thil ho ang reng tak, mahse harsa ve tak si chu MAHNI NIHNA HRIAT hi a ni awm e. Chhungkua leh mimal nuna kan inhriatfiah tawk loh dan hi chu tu tan mah phat rual a ni lo. Tling ve fua kan inngaihna hi midang min tehna atang chuan kan tlin tawk lohna a ni thei a, kan tlin tawk lohna nia kan ngaih te hi mi min duhna lai a lo ni hlauh thei bawk. Engpawh nise, chhungkua leh mimal tute emaw sawi ka tum lo. YMA- ah pawh Nursery Veng Branch YMA kal dana ka thil hmuh ve phak chin hi sawi ka tum mai a ni. Lo inngaihbel kan awm anih chuan kan nihna a ni duh viauin ka ring.

Hruaitute duhsakna zarah Branch YMA Executive Committee zahawm takah ka tel ve leh zauh thin a. Mite angin thawhhlawk lo mah ila Committee boruak fak emaw sawisel emaw thei tawk chuan tawn hriat ka nei veah ka inngai.

Hemi chungchang ka sawi duhna chhan chu hei hi a ni. YMA Executive Committee hi Assembly House-a rorel anga Ruling emaw Opposition emaw awm ang kan ni lo tih hi kan hriat fo a tha. Thenkhat chuan opposition emaw ka nih inti niawm takin hruaituten Agenda an chhawp chhuah apiang tawng pawng hnial ngawt ching awm palh theih a, a pawi hle thin. Amaherawhchu, thil tha zawk duhna avanga Agenda tan zawng emaw sawisel zawng emawa thusawi erawh a ropui a, thil tha zawk pawh a chhuah phah deuh nge nge thin.

Tin, Committee pawn lamah Executive Committee Member chinte hi chu kan tawng fimkhur a tul hle. Thurel bawhzuitute tan Committee thu passed ang diak diaka kal rem loh chang a awm palh thei a, hetiang hunah hian midang zinga lo sawisel vak vak chingte hi chu mahni mawng hlim mai an ni tih hriat a tha hle. Sawi sel duh kan nei anih pawhin Committee-na ah emaw hruaitute hnenah emaw sawi mai ila, chu chuan in lungrualna a thlen ang a, hmasawnna pawh a thlen bawk ngei ang.

Branch YMA Executive Committee Member chinte hi chuan mahni nihna hre reng chungin, YMA hmalakna midang zinga sawisel vak vak lovin kan khawtlang thatna tur ngaihtuah chunga ke pen fo zawk tur leh a tul anga hruaitute pawh finchhuah fo zawk turin Taitea hian Nursery Veng Branch YMA Executive Committee Member zawng zawngte a beisei tlat che u a ni.

Leave a Reply