TAITEA HUANG

Aizawl Veng tam takte hian hma an sawn em em a, chung zingah pawh chuan kan veng pawhhi a tel pha ve ngei ang. Mahse veng dang kan tluklohna chu kawng tam tak ala awm ve tlat thung, tunah hian Basketball Court kan nei ve dawn ta hi a lawmawm tak zet a ni.

Ka sawi tum ber chu mi veng hi an lova tangrual tak em!!! keini Nursery Veng ngei hi kan tanrual lai ber ni a ka hriat chu YMA Zaipawl intihsiak lai kha niin alang, veng mipuiten kil tin atangin tan kan khawh tlang vek a, a nawmzia pawh kan hre vek awm e. Mi vengte chuan kawng engkimah an lo intawiawm tha thin hle tih hi hre nawn leh ila, YMA Hall nei tur pawn an veng chhung a pawl hrang hrang entirnan: VC,MHIP, MUP leh YMA te hian zu nawr tlang dial dial a, hruaitu pahnih khat kal ai chuan alo dawngsawng tu tan chuan an va zahawm dawn tak em. Kan veng hmasawnna tur a nih phawt chuan hawh u i tang tlang dial dial teh ang u

Tunlai hian kan veng naupangte chu Football lam ah an tui thar hle a, mahse inkhel turin mi vengah an va kal thin hi chu an khawngaih thlak a ni e, hemi kawng te pawh hi i ngaihtuah nawn leh teh ang u, kan vengah hian 9 field te pawh kan nei ve thei law mi???? Thahnemngai taka ngaihtuah tute tan chuan kan veng hian hma kan la mek ni berin alang, kan beisei sang lutuk ni pawh in ka hre love, mi veng pawn an bei a, an tangrual a an nei mai zel si a, keini veng pawh hian tangrualin bei ve ila kan nei ve thei reng a ni lawm mi??? Kan tu leh fate hian in tihlim turin mi veng kan pantir zel dawn nge kan veng ngeiah thlamuang takin kan in tihhlim tir dawn???? Kan hruaitute hian tan an la a, Basketball Court te pawh kan nei ta mai a nih hi, mitthla a awm chu basketball khel chak ve si kan veng naupang ngei ten Board an siam chawp a an phun lai hun te kha a ni, mahse tunah chuan a tak ram kan thleng ve ta a, hma pawh kan sawn zel ang tih hi ka ring tlat a ni.

Nursery Veng kan ni a, kan veng chhungah ngei hian Mizoram mai pawh ni lo India ram aiawh pawh a zahpui awm loh tur talent tha tak tak nei la hai chhuah si loh kan nei tih hi hria a, heng avang hian veng mipuite zawng zawng hian ngaihtuah chiang a hmasawn turin i pen rual dial dial ang u, Tangrual hi chakna a ni si a..

Leave a Reply