TAITEA HUANG

Kan hmalawk Ni 15.6.2011 (Nilaini) hian YMA Day kan lo thleng leh dawn ta reng mai. Mizo tlawmngaihna ngaihlu tu leh YMA tana mi thahnemngaite tan chuan he hun lo thleng tur hi kumkhat chhunga HUNPUI pawimawh tak pakhat a ni awm e. Mizoram Sawrkar pawhin he YMA Day hi a ngaihpawimawh em avangin Sawrkar chawlh (Holiday)-ah a puang hial reng a ni.

Sawrkar-in YMA Day chawlh a a puan chhan hi mi tamtak chuan kan ngaihtuah chiang meuh lo niin a lang. YMA Member ten ram leh hnam, khawtlang leh tanpui ngai midang tana thil tha kan tihna hun atana a ruahman tih kan hriatreng a tha awm e. Mi tamtakin hei hi Zirna School leh Sawrkar Office chawlh pangngai ang mai a ngai a mahni duh ang zawng zawng a hun kan hmang thin anih chuan Sawrkar-in YMA Day chawlh atana a puan hi a nih tur angin a hlawhtling hauh lovang tih hi kan hriatreng a tha awm e.

Kan Branch YMA pawhin kumin YMA Day zingkarah Branch pumhuap hnatlang koh turin ruahmanna siam a ni a. He hunah hian veng tana thil pawimawh hnathawh tur kan hruaitu ten an rawn ruahman ngei ang a, chu an ruahmanna siam chu kan
mimal emaw kan chhungkaw bil emaw tan thil pawimawh tak a lo ni kher lo anih pawhin, khawtlang tana thil pawimawh anih miau chuan YMA Member zawng zawng ten thahnemngai taka kan hnatlan hi kan tihmakmawh a ni. Chhun lamah pawh kan thenawm Branch (Bungkawn & Bungkawn Vengthar)-te nen Sport discipline hrang hrangah intihsiakna kan nei dawn
a, intihsiaknaah hian kan tel ve dawn chiah lo anih pawhin YMA member kan nih ang ngei a a tel turte tawiawm hi kan tihmakmawh a ni dawn a ni.

Nu leh pa te pawhin YMA Day hi Sawrkar-in chawlh atana a puan takah chuan kan hna pawimawh dangte kalsan a kan YMA Mem-ber-te chevel kan tawiawm hi a
mawi hlein a rinawm. Rokhawlhna
lian tak kan nei a nu leh pa te kan
che chhuak thei dawn lo anih
pawhin kan fate theuh he huna an
tel ve ngei theihnana kan lo fuih leh
hun kan lo siam sak pawh a
pawimawh hle awm e.

Chhun lam programme
phei hi chu Nursery Veng a hman
tur anih avangin a veng neitu ber
atangin Member kal kan awm
mang lovang tih pawh hlauhawm
tak a ni. Chutiang a Member kal
tlem chung changa a veng neitu ber
kan mualpho palh anih hlauh chuan
kan Branch YMA hruaitute
mualphona mai a ni dawn lova,
Nursery Veng mi a te ber atanga a
lian ber thlenga kan mualphona a
ni tih hrereng chunga NGO dang
leh Kohhran hrang hrang pawhin
YMA Day Programme hi kan in
ngaihpawimawh sak a pawimawh
hle dawn a ni. YMA Day
hlawhtling tak kan hman theih ngei
nan tun atanga loin buatsaih lawk
turin veng mite kanin sawm tak
meuh meuh a ni. YMA DAY
HMAN NUAM VEK ULE!!!!!

Leave a Reply