TAITEA HUANG

NYMA-in kum 10 chuang zet hmel a hmuh ve tak hnu leh Member pawh 1000 chuang zet an lo nih ve tak hnuah hian ka ngaihtuahnaah thil tam tak a lo lut a. Ziak emaw sawi emaw thiam tak ni ila chuan ngaihnawm taka ziak/sawi tur ka pai chiang khawp mai. Tun tumah hian YMA Circle bik liau liau thlirin kei Taitea hian ka ngaihdan ka sawi dawn a, a duh apiangin in ngaihdan han thawh ve ula Nursery Veng tan engemaw zawng talin hlawkna a thlen ka beisei tlat a ni.

YMA hmalakna avang hian mi tamtakin hlawhtlinna an lo chan phah tawh. Entirnan, tu khawkha in an la hriat lem loh mi pakhat chu YMA General Conference-ah an Branch aiawhin a zai hlauh mai a, a in buatsaihna a tha in a chemkalna lam tak a lo ni bawk nen mi lawm a hlawh ta phian mai a. Chu chu hmang tangkai chho zelin ram pumah a lo lar phah a, zai lamah sum tam tak hlawh chhuak thei khawpin a in vawrh chhuah phah ta hial reng a ni.

Mahse, chumi chuan YMA Member a nihna te, YMA thil tum leh din chhan te a lo hre reng reng lo nge? Mitthi lumennaah a hmel hmuh tur a awm ngai lova, mite aiin khum a nei nuam bik pawh ni der si lovin khawharin a riak turin an In ala chhuahsan lo hrim hrim a, thlanlaihnaah lek phei chuan tel ve chu sawi loh, an thlanmual awmna pawh a hre mumal lo. Vawikhat amah hringtu nu ngei a boral tumin thlanmual a thleng ve hlauh mai a, chu chu an veng thlanmual a hmuh vawikhatna leh a tawpna ala ni ta rih anih hmel.

Khitiang milar khi Nursery Veng hian kawl khawm teuh mai ila veng nuam kan ni ang em? Chhiatni/thatni tawh nikhuaah kan thlamuanpui ang em? Teuh lo mai!!!

Mitinin tui zawng leh thiam zawng kan nei hrang theuh ngei ang. Sports, Zai, Lam, etc. lama tui deuh ten kan chemkalna lam chauh ngaipawimawhin, YMA kan nih anga kan mawhphurhna te hre lo lekin kan kal palh mai ang tih a hlauhawm hle. YMA hmalaknain kan tui zawng eng thilah pawh kan tel a ni thei, chu chuan chhiatni thatni a kan mawhphurhna kan hlenna kawngah pawh tlem te tal chuan min phuar ve se, a tul phawt chuan thlanlaihna hmunah pawh min hruai thleng thei hram se a va ropui dawn em. Ka tui zawng anih vang mai a YMA hmalakna engemaw thil pakhat leka ti-hluai, thil dang a thehhmeh ang mai a reh leh hmiah te ka nih chuan ka awm dan zawng zawng miin min thlir reng a, engmah reng hi an hai lo tih i hre thar mawlh teh ang u.

Leave a Reply