TAITEA HUANG

Harsatna lian tak pumpelh theih rual loh te a awm anih ngawt loh chuan kan hma lawkah Lal Isua piancham kan lawm leh ngeiin a rinawm. November thla chanve dawn han thlen hi chuan rilru hian Bethlehem lam a hawi lo thei thin lo. He hun-pui lo thleng tur zet hi chu a pawimawh em avang hian nasataka lo in buatsaih lawk pawh a awm reng a ni. Mi veng dinhmun ka hriat miau loh avangin kan veng tan bika duhthu ka lo sam ve dan te, vawi duailo suangtuahna ka lo hman ve dan te hi miin min pawmpui se tih vang pawh ni hauh lovin han puanzar ve hrim hrim ka chak deuh tlat a ni. Chutichuan, heti hi a ni a…

Kan vengah hian chhungkaw 450 vel kan awm a, chung chhungkaw hrang hrang te chu in pawh tlang tak leh in ngaina tak tak te kan ni fur hlawm. Theih nise Krismas ruai la kilho ngai reng reng lo mi tam tak te zingah hian tumkhat na-reng- reng chu Krismas ruai han kilho thlahlel tak tak kan awm furin a rinawm tlat a ni. Hman lawka kan Branch YMA kum 10 tlin kan lawm tum khan mitin mai khan in pawh tlang taka chawhlui han kilho kha kan lo thlahlel hle tih chu hai rual a ni lo. Mahse, chutianga mi in thlahlel tak tak te pawh chu Kohhran bang chhah taka hung hnan kan nih miau avangin he hun-pui lo thleng turah hian Krismas ruai ropui kan kilho leh thei dawn lo niin a lang a, a uihawm leh vawng vawng dawn mang e!

Kan tana nau lo piang khan he khawvel a a awm lai khan thil tha tamtak min zirtir a, a thu vuakthlak kha a fin em avangin kum sanghnih dawn a liam hnu pawhin ala ngaihnawm dawn chauh ni te pawhin a hriat a ni. Mahse, chutiang taka thufing min zirtirtu khan a piancham lawm dan turah Kohhran hrang hrang ten a hrang theuh a lo lawm turin min zirtirna awm reng reng kan Bible-ah hmuh tur a awm der lo. A piancham kan lawm berin chutianga min khap hauh loh lai a a hran a hrai a a piancham kan lo lawm thin hi engtin tak ngai ang maw?

Chuan, hemi chung chang a rawtna ka siam duh chu hei hi a ni. Kan vengchhung a Kohhran hrang hrang hruaitute hian “a huhova Krismas hman” han rel thlu rup mai se. Chanvo hrang hrang nei tur te Kohhran hrang hrang atanga in ruatin hma han la suau suau mai ila a ropui danglam hian ka ring thin. Chutianga ruahmanna kan siam thei anih ngat chuan hun lo kal zel turah pawh kan veng hian kawng hrang hrangin hma kan sawn phah ngei ngeiin ka ring tlat a ni. Hemi atan hian Kohhran mal ten hmunhma kan nei lian tawk lo anih pawhin Middle/Primary School hi kan hmang thei em em in a rinawm tlat a ni.

Leave a Reply