TAITEA HUANG

Kan that tlanna turte anih takin ka huang leh i huangah hian han phunnawi leh hlak i la a tha awm e. Mahse, nangmah ka tihna a ni miah lo a nia. E, thenawmpa i in care ve deuh i la, mahni ram leh kawt ni loah thil kan tih dawn chuan a tuartu tur leh a nghawng chin a awmte hi chu i inberawn ve hram ang u hmiang. Tihin bul hi han tan phat teh ang…

I in i sa dawn tih chu ka hria a lawm, mahse, bungrua chhek khawmna tur i mamawh dawn a, i kawt, ka kawt i hman a ngaih miau si chuan min han rawn der ve la. Chuachhapah tui hawk luankawr i hnawh a, kawnga kea kal chite pawh kan awm a, motor- a kal chite pawh kan awm bawk, harsatna siam kher hi i tan pawh a nuam bik em ni le?

In chu kan la sa ve vek dawn a lawm, ka bungrua dahna hmunte chu ka ram ni lo mah se vangtlang kawngte chu engngemaw chen chu ka hman a ngai a, i kawtte pawh ka hawh ve ang chu nang pawn in i sak hunah hei hi chu ila mamawh ve dawn tho a lawm le…

Eu..! in lo invaw thlu hlauh a nge, in dik ve ve…. Thenawm khawveng hetiang mai maiah kan inhmu sakhi tur a ni lo ve.. Ni e, In kan sak dawn chuan kan bungruate thenawm khawveng tana hnawk lutuk lo leh vangtlang tana hnawk lutuk lo deuha dah dan pawh a awm a, kawng kal leh lirtheia kalte tan pawh harsatna siam lo hram a tha, tuihawk luankawrte dan pin reng ai chuan a luanna lo sawn rih mai pawh a awm tho mai. Engpawhchu nise, kan la tawn theuh tur a ni a, thenawm khawveng in pawisak lohna lutuk thil ang chuan chet loh a tha, tin, i thenawmte harsatna chu lo dawngsawng thiam ve bawk la, tichuan, in harsatnate inhriatthiamna thuk tak in nei dawn a ni. Harsatna tawk lovin in inhrilh hre zawk dawn a, in infinchhuah zawk dawn a ni.

Ti khan in harsatna te chu a kiang mai chuan ka ring deuh. Eu! Thil pakhat motor dahna bawk hi a ni, thenawm khawveng kan buaina thin chu.. A then mahni hmasialna avangin vantlang kawng kan dal tih hre duh hauh lova kawngkam mi kalna leh garage dala motor han dah duh tlat maite hian engnge mawan han chapopui viau le? Mi garage kawt leh kal kawnga motor han park te chu Aizawla mi mawl tawp-khawp pawh hian an ching lovang tih theih khawpa mawi lo a ni. Thente erawh hi chuan mahni kawt leh mahni In leh lo nei lo a tam zawk kan ni, inhriatthiamna pawh a awm zawk khawp mai. Mahse, kawngkama motor kan dah dawn chuan a kawt neitute biak thlap hi a zahawm khawp mai. Nang paw’n veng dangah i kal ve duh tho, chutah chuan i motor park lawk chu i duh ve dawn tho.. Hawihhawm taka kawt neitute hrilh thlap hi a ‘Pathian thu awi’ lai tak zawk a chu a ni thin.

Thenkhatte ve thung chu.. pa tha duam awm tak si…mi garage kawt leh kal kawnga motor park sawi lova bo vang vang zawn ngai te, thenawmte kawt/garage kawta motor dah tum phet, mahni kawta dah hnawk duh leh si lo..mi kawt mahni kawt ang a hman tum lo keipuisahauh ve ringawt te hian an rilru duhamna awlsam tein an pho chhuak ta thin a ni. (Hei hian a ruka inngaihnepna a hring chhuak thin). A chhan ber chu mahni huamhauh vang te, mahni hma kan sial luat avangtein thenawm khawveng kan in zah zo lova, inngaihpawimawhna a tlem tial tial a, chuvangin pawn lama inngeih awm taka lan a tul ta thin a ni. Chhungril takin kan inhlat leh hle lawi si! Kan rilru lo tak tawngkam tha takin kan inbe thenawm khawveng ta mai mai a nih ber mai hi! Rawngbawltu kan nihna zawn theuhah kan inngainep a, kan in chhin sak satliah vel ta mai mai a ni maw!

Leave a Reply