Taitea huang

Zofate tana YMA a tangkai zia leh a tel lova ke pen a harsat tawh tur zia chu mi pangngai chin tan chuan hai rual a ni lo. Chutih rualin mi thenkhatin YMA hmalakna reng reng a tel hi mahni tih tura ngai reng reng lo, midang tih tura ngai lui tlat kan awm fo. YMA hmalakna a tel ve chu sawi loh, chhungkua emaw mahni hna tul emaw ngai pawimawh tawk lo te telna tawk a YMA ngai tlat pawh kan awm hial niin a lang.

Heti zawng hian kan ngaihtuah ngai em? YMA hi mi lian leh mi te, hausa leh rethei, hmeltha leh hmelchhia, fing leh fing vak lo, mi chitin chitang huang khat a min len za tir thei tu Zofate tana pawl pawimawh tawp a ni. YMA hi lo awm ta lo se, kan vengah ngei pawh hian tuna in kawmngeih tak tak zingah hian in kawm ngai reng reng lo tur kan awm nawk ngei ang. Chumai a ni lo, finna leh felna nei sang bik pawh ni hauh lo kan hruaitute ngei pawh mi in mi pangngai hmuh a an hmuh phahna chu thahnemngai taka YMA-a rawng an lo bawl ve thin vang a nihna chen pawh a awm in a rinawm.

Mi thenkhatin YMA hmalakna ngai pawimawh lo tih hriat taka a engahmaha an thawk chhuak duh reng reng lo te hi chu “ka PA an ni hi ngai dam rawh…” ti a tawngtaipui hial pawh an tha awm e. Thenkhat chuan YMA-ah mawhphurhna pawimawh tak Br. Exe. Member emaw Section hruaitu emaw an nihna te engahmah ngai lo tih hriat taka vawi te khat mah hnatlan emaw Committee emaw a an han tel duh lo te hi chu an sual leh luhlul vang pawh a niin a lang lo, an chapo vang anih loh vek chuan an chiangkuan loh vang tal a ni ngei ang.

Kumtharah hruaitu thar kan nei ang a, Committee Member thar te kan awm leh ngei ang a, kan hmazawn theuh a tih tur awm te thahnemngai takin ti ho dial dial ila, pawl chhungah inlungrualna tha a thlen ang a, veng tan hmasawnna rahbi pawimawh tak a ni ngei ngei ang. Hmalakna zawng zawngah tel theih erawh a ni dawn hauh lo, kan thawhpuite hnenah tha taka kan harsatna te thlen a hawihhawm taka phatna chang hriatte pawh hi mi puitling zia a ni tih i hre thar leh ang u.

Leave a Reply