TAITEA HUANG

Zirna hi ram siamthat nan a pawimawh ber emaw chu aw tih theih hiala pawimawh a ni a, mithiam kan tihte hi awm ta lo se Mizoram hi hetiang ang kan la ni phakin a rinawm loh. Ram hmasawnna tobul kan tih fo infrastructure hrang hrangte hi mithiamte thiamna hmanga neih thin a ni a, an tel lo chuan engmah a kal thei lo a, an kut innghai tlat a ni.

Thiamna pawimawhzia kan sawi seng lo ang a, Mahatma Gandhi chuan, “hmasawnna tinreng” tiin zirna pawimawhzia kum 60 chuang liam ta khan a lo ti tawh a, vawiin thlengin a dik lo ti pakhat mah an la awm lo! Mahse duhtawk phawt ila. Ka sawi duh chu kan veng hi zirna kawngah kan hniam hle ka ti tlat. Kum 14 chin lehkha zir tawh lo engzatnge awm ang? Heng lehkha zir rual tete lehkha zir lote hi mi fel leh taima tak tak an awm laiin khawtlang tana hnawksak mek, la hnawksak mai tur an kat nuk ang.

Khawtlang thatna tur te leh hmasawnna tur te mi thahnemngaiten an sawi fo a, a tha e. Heng kan veng tana pawimawh kan sawi fo zingah inkalpawhna kawngpui, Hall adt. kan sawi fo ai hian zirna hi a pawimawh zawk lo maw? Mithiamte sawi fo thin chu ram leilung hausakna aiin a ramchhunga mihring chengte ram hmasawn nan an pawimawh zawk a. Europe ram leilung hausakna nei tlem tawhte aiin vawiin thlengin leilung hausa Arab ramten an la tluk hlei thei lo!

Mipuiin kan chik ngai lo mai thei heti khawpa zirlai rual tete lehkha zir lo kan tam ta mai hi engvang nge ni ang le? Heti zela kan kal chuan mi vengte ke pen rualin ke kan chhep ve hman lo ang a, mi hnungah kan tlan ang. Lehkha zir lo tam ta hle hi tu mawhphurh nge le? He veng a ni lawm ni naupang chherchhuaktu tur ‘Nursery Veng’ kha? He veng hming hi a nihna bul hre tan chuan a chhuanawm a, kan ram leh hnam la khaidingtu tur mi tha tak tak chherchhuahna hmun lo ni mawlh teh se.

Leave a Reply