TAITEA HUANG

Kumin Krismas chu Pathian kaihhruainain kan lo thleng leh dawn ta reng mai. Lusun chhungkua te tan he hunpui lo thleng tur hi a lungngaih thlak ang bawkin hun rei tak lo in hmu tawh lo Krismas denchhen a in hmu leh tur te tan chuan a nghahhlelhawm ve hle ang le.

Krismas ropuina leh hlutna hi mi tamtakin kan hre pha lo mai thei. Chatuan nun kan neih theihna tura Pathian-in a fapa mal neih chhun he Khawvel-a hringmi chang tura a rawn tirh cham pha anih miau avangin Krismas-in a ken tel thil pawimawh tawp chu THILPEK chungchang a ni. Fapa mai pawh nilo, misual ten chatuan nun an neih theih nana fapa mal neihchhun pekna ni Krismas hi ringtute tan chuan ropui taka lawm hi a phu hliah hliah a ni.

Krismas lawm tura nasa taka chhungkua kan inbuatsaih lai hian kan thenawm khaw vengah enge thleng tih leh kan bul hnai maiah riltam dang char chhungkua an lo awm palh em tih erawh ngaihtuahna chang kan hriat a pawimawh khawp mai. Thilpek zawng zawng a hlu ber FAPA MAL min petu kan Pathian hian Krismas denchhen a midang tana thilpek kan pek ve hi a phut tlat in a rinawm a ni. Chuvang chuan, keini pawhin tlem lua leh tam lua thlu lovin, kan phak ang tawk theuhin midang tan engemaw tal pekna hun a tan he Krismas lo thleng tur hi hmang thei ila chuan chunglam a mi pawh khian nasa zawkin malsawmna in min vur ngei a rinawm tlat a ni.

He hunpui lo thleng tur denchhen hian NYMA hruaituten vengchhung mi harsa zawk te tan tanpuina pek an tum niin hriat a ni a, NYMA hruaitute ruahmanna siam hian rilru a khawihin lung te pawh a ti chhe lek lek zawk a ni. YMA sum atang mai a pe lova vengchhung mi inphal te tana tanpui ngaite tanpui theihna tur a ruahmanna an han siam phei hi chu veng mite tan lawmna tur hlir a lo ni. Tlem lua leh tam lua awm lovin, kan theih ang tawk tawk in engemaw zawng talin midang tan malsawmna nih tum ila, chu chuan kan chhungril nun a tinuam ang a, phat rual lohvin kum dang zawng aiin kumin krismas kan hmannaah hlimna leh lawmna kan chhar chhuak ngei ngei in a rinawm tlat a ni.

In chhungkuain ei sen loh in neih lai khan in thenawm hnai takah khan naktuk zinga thlak tur buhfai no khat lek lungkhamin chhungkaw pa ber a rum tlawk tlawk a ni tih hriatpui la, hak sen loh thawmhnaw in neih lai khan in thenawm hnai takah khan inchei mawina chu sawi loh, in tih lumna tur tak ngial pawh nei lo, damdawi leina tur pawh nei bawk si lovin tu emaw chu mittui tla zawih zawih in a mu kawm reng a ni tih i lo hre lo palh hlauh dah ang e. Chung mite tanpui tur chuan ke i pen chhuak thei lo emaw hun i nei ngang lo emaw anih pawhin an tan a malsawmna i nih theihnan NYMA-in ruahmanna tha tak a siam sak che a. Chung mite pual a bawm an hunah chuan i thlak hman lo emaw remchang ngang lo anih pawhin NYMA hruaitu a remchang a piang hnenah in hriattir la, midang tana malsawmna nih i chak thin em em kha a hlawhtlin theih nan ruahmanna an lo siam sak dawn che a ni.

Kumin Krismas chu mahni nuam tih zawng mai a hmang ral lovin, midang tana malsawmna ni ve ngei thei turin hman i tum tlang ila, chumi a hlawhtlinna atana pawimawh leh awlsam bawk si chu tanpui ngaite tanpui a ni tih i hre thar mawlh ang u khai…

He hun lawmawm takah hian kan tan a fapa mal min rawn pe a. Nang atan i inpe ve phal dawn em le…chanhai riangvai te’n an nghak reng che.

Leave a Reply