TAITEA HUANG (Darkar bi-a inhlawh)

Tunlai khawvel thang zelah mi kan lo tul ve ta em em mai a. Mizote pawh kan hun a khat ve ta khawp mai. Kei
Taitea ngei pawh hian hun awl, mite tana thu han ziahna hun pawh ka nei hman ta meuh lo ani, a lawmawmah ngai ila. Hun chep tak karah tunah pawh hian ka rilru kap tlat tu, mi dang ngaihdan hriat ve ngai tlat bawk si ka rawn ti hram a ni, min lo ngaihtuahpui ve teh u.

Hetianga hun kan ngaihhlut ve tawh a, hun awl kan neih hman tawh meuh loh avanga ka rilru kap ta em em mai chu Darkar bi-a hnathawha inhlawh theih tih chungchang hi a ni. Chhiartu zawng zawngte pawhin min lo ngaihtuahpui ve dawn nia. Tha tura min ngaihpui ve anih chuan a tihhlawhtlin dan kan ngaihtuahho zel dawn nia.

Mizo te hi tunhma chuan ngaih sam leh thil duh uluk vak lo, pawmzam mai mai awlsam tak kan ni thin ti ila tu’n kan ngai haw em lo’ng chu maw.

Mahse tunlaiah erawh chuan IT age- ah awmin khawvel thil hrang hrang kan in chhungah Internet hmangin kan hmu ve nghal zel thei tawh a. A tak pawhin khawchhak atang leh thlang lam atangin thil changkang leh tha tak tak, Furniture lam te Electronic thilte leh thil dang dang han en reng reng pawha mawi leh nalh dak thlarh mai kan hmu ve zel tawh a. Hei hian kan rilru pawh a hmasawn zawngin a hruai ruak ruak mai niin ka hria. Chumi rah chhuahah chuan thil hi kan duh uluk ve ta em em mai a ni.

Kan inchhung thlak danglama siksawi hret ka duh a, mahse nileng daih em tur ani si lo. Mahnia han thawk tur em chuan ka mistiri-nain a ti nalh tawk dawn si lo. Mistiri ruai dawn ila ni khatah Rs. 400-450 a ni daih mai si, ka va buai tak em…..

* Zirlai, tlangval, zing kar dar 6-9 vel thleng class kal ka ni a. Inhlawh ve ka duh viau pawhin ka class neih dan atangin zing dar 10/10:30 vel hma chuan ka hman thei si lo, ni lengin engmah tih tur nei lo, inhlawh duh leh mamawh em em siin ka awm mai mai ta thin ani. Dar 10:30 vela tan tura min ruai duh awm se ka ti ngawih ngawih thin.

* Tlangval thalai, football fans ka ni a. Tlai dar 3:00-ah ka team tante lammualah an inkhel dawn a en ngei ka duh si, pawisa chu mamawh viau mah ila ka thawh nilen theih dawn loh avangin nilengin ka awl ta mai mai thin, uihawm ve
tak chu a ni.

* Mistiri ka ni a, ka chhungte veng dangah an boral hlauh mai a, chhun dar 12-ah vui tur ani a, kal ve ngei ka ngai si, ka nilen hman dawn loh avangin ka chawl nileng ta mai a ni. Chawhnu dar 1:30 vel atanga thawh min remtihsak se chuan ka thawh hun chhungah nanana chuan ka ngawrh ngawt ang.

* Mistiri/helper hnathawk thin ka ni a. Tunlaiah miin facebook/internet an ti a, mistiri/helper mai mah ni ila engemaw chen tal hriat ve loh chuan mi titi kan phak lo mai si. Chawhnu dar 3:30 atangin Computer class kal ve ka duh a, ka thawh nilen hman loh avangin tunthla chu ka chawl tawp mai a ni. Computer zirna lamah sum hek si hlawh chhuak si lo, a hau tak khawp mai.

Awle sawi tur case hrang hrang atam mai, mahse sawi vek lo mai ila, a chunga entirna case panga atang mai pawh khian Darkar bi-a hna hi thawh theih ni ve tawh sela, mizote hian economically-in hma kan sawn awk mai lo’ng maw. Bakah mizote hi chhungkaw pawipang nei ve deuh reng kan ni a. Hetianga a darkar bia hnathawh theih a nih chuan helamah pawh hian kan thathnem phah thei zawk viau lo’ng maw.

Darkar bi-a thawh dan leh inrawih dan felfai tak ruahman ni ta se Mizote tan hian a tha viau tawh mai awm mange tih hi ka rilru kap em em mai tu chu a ni a…Titi-na hrang hrangah te min lo kam tampui ve teh u, kei chuan kan thatpui hi ka ring em em mai a ni. Thalai hnathawh tur nei lova awm mai mai te hi an awm duh mang loh mai te pawh a beiseiawm thei hialin ka hria a nia.

Leave a Reply