TAM A TUL

Assam leh Mizoram State ramriah buaina hi a reh maiin a rinawm loh hle a, hetiang a buaina leh harsatna kan tawh chang hian, kan Ministry fawng chelhtute kan demrawn luai luai thin. A mawh pawh an phur lo thei lo reng bawk, chutih rualin heng hun a lo thlen a rilru a lo awm ve daih thin chu kan nuamtawl duh lutukin Pathian phal loh kan hmeichhiate chhul rehpin intihhmuh kan ching ta lutuk pawizia hi kan la hre zel dawn a ni tih hi. ‘Fanau te hi Lalpa lak a kan rochan an ni a, ril a rah hi a malsawmna…’ tih hretute hian Lalpa laka rochan leh a malsawmna aia kan nawmchen duhna kan thlang thin hi Pathian pawisawina liantham a ni ang tih a rinawm hle.

‘Chhungkaw tlem hi changkanna’ a nih lohzia chu Assam leh Mizoram ten ramria harsatna kan neih hian a tichiang viau, heti chung pawh a kan la harh lo a nih ngai chuan, hun rei loteah he kan hnam hi a boral thuai ang tih a hlauhawm ta takzet zet a ni.

Lalpa laka rochan fanau kan huphurh a, a malsawmna rîla rah kan hnawl si chuan, khawi rochan leh malsawmna chu dawng turin nge kan la tawngtai fo? Mizote hian tam tura tan kan lak a tul takzet tih hriain i harhthar ang u. Kan chhehvela muslim leh hnam hnuaihnung zawka kan ngaih, Tuikuk (Bru) leh Takam (Chakma) te hian, Birth Control an ngai pawimawh ve em?

Fa neih tam hian chhungkaw khawsak harsat chhung chu a awm ngei ang, mahse an lo puitlin thuau hunah, hna an han thawk sung sung tur mitthla chunga fa neih hi a hluin Mizote mamawh zawk a lo ni ta. Assam-in L.S. MP 14 leh R.S. MP 7 a vaiin MP 20 chuang an nei a, keinin khawngaihnain L.S. MP 1 leh R.S MP 1 a vaiin MP 2 kan neive tawk a, India rorelna khawlah khuan kan inhlut hleih em!

Ramri issue-ah pawh a vote ngah lo Mizoram ai chuan, a vote ngah zawk Assam chu an hlauvin an zah zawk lo thei nang le. India ram rorel khawl lian hian Mizo mipui hi an mamawh vak ring duh suh. Mizo mipuite aiin kan zoram leilung hi an mamawh zawk tih pawh hre telin, inlungrual lo tham pawh kan awm loh hi. Kan ram zim te pawh luah seng lo hnam tlem te hian fa neih tam i hreh suh ang u.

Kohhran pawh hian hnam issue ngaihtuahin nupui pakhat aia tam neih te hi phal hial se kan mamawh zawk tak chu a ni.

Chi tam tak thlaha lo pungin, leilung hi luah khat ula, in thu thuin awmtîr rawh u…” (Gen,1:28) tih hi siamtu Pathian thu chu a ni.

Leave a Reply