TANRUAL CHU CHAKNA

Pi leh Pu, Thian duh tak te u, Ka taksa ah natna khirh tak mai Cancer alo awm ve reng mai a. A hria apiangin an remchan ang angin min rawn kan a. Thenawm ten ka ei tui loh hlau in ei tur chi hrang hrang te min pe a, ka dam leh vat theih nan Kohhran hrang hrang te, mimal leh chhung leh khat ten Pathian hnenah min dil pui a Pathianin mal min sawm sak a ka tha chak khawp mai, Lalpa chu fakin awm rawh se. Tun anga ka that chhoh zel chuan, veng mipui te leh kohhran tan ka rawn pen chhuak thei thuai dawn e.

Khawvel natna Corona Virus natna in, kan veng pawh min rawn run mek a, hetah hian, thawktu LLTF te hmalakna chi hrang hrang ah, mipui ten kan tih ve tur pawimawh tak kan nei a, chumi chu Thuawihna hi a ni. Kan khawtlang hruaitu te leh kan NGO te thu chhuak te mipui ten mahni chhungkua theuh ah lo zawm i tum theuh ang u. Hetih lai hian hnathawktu te mamawh chi hrang hrang leh Veng chhung mi ten ei leh in tur an tlak chham loh nan, vengchhung mi in phal ten, LLTF ah sum leh pai, ei leh in etc, an pe thin a. A van lawmawm tak thin em!!!

Tun hunah kan tanrual sauh sauh a pawimawh hle a ni. Kan sum, kan tha leh ngaihtuahna te midang ten malsawmna an lo chan theihnan, i in hlan thar theuh ang u. I kut lo chu Lalpan kut a neilo, thilpek hlu tak tak petu te Lalpan malsawm che u rawh se.

Kan thawh ho thatna hian Nursery veng hi veng ropui pui takah min chuankai tir thei a ni tih hre reng chungin kan puanven i sawi chhing tlang teh ang aw.

Nursery veng vul zel rawh se. Ka lawm e.

– C. Darthankima
Member, Local Council
Nursery Veng

Leave a Reply