TANRUAL HI CHAKNA

– R. Vanlalhmachhuana
President, NYMA

Pathian hruaina in Kum 2022 chu dam takin kanlo thleng leh ta a, he hun lawmawm tak min hruai thlengtu Pathian chu fakin awm se, khawtlanga ka rawngbawlpuite Kumthar Chibai ka buk che u a, he kumthar hi intan kumtha lo ni mawlh rawh se, tiin duhsakna ka hlan a che u.

Kum 2022 chhung atan YMA hruaitu mawhphurhna chelh turin member ten min thlang hi a lawmawm rualin phulo ka inti in ka huphurh tak zet a, amaherawh chu YMA hi hruaitu te kutah chauh a in nghat lova, YMA Member zawng zawngte nena kan tanrual a, kal thei chauh a ni tih ka hriat in, Nursery Veng hian hma kan sawn theihnan Member zawng zawngte hnathawh kawr ha a, lungrual tak leh theih tawp a hruaitu te min nawr kal tur leh min fin chhuah zel turin ka sawm hmasa che u a ni.

Hripui leng avangin khawtlanga kan inkaihhruaina te a pangngaiin a kal thei lova, chuti chung chung chuan chhiatni leh thatni a kan Mizo tlawmngaihna kan lanchhuahtir thin te erawh a theih ang ang a kanla kalpui thei zel hi a hlu in ava ropui tak em, i chhawm nung zel ang u.

YMA hruaitu leh YMA Member taima lo tan chuan YMA ah hian phunna tur a tam hle mai, heng tlawmngaihna te hi kan hun awl neih ringawt in a daih ta lo a, chuvang chuan tlawmngaihna tak tak nei tan lo chuan chhuanlam siamna tur a tam dawn hle a ni. YMA ah hian mahni phur thut chang chauha tel chi a ni lova, chuvangin, “Teirei peih” mi kan ni tur a ni. Khawtlang hruaitute kan in lungrual that a ngai a, kan inkawm ngeih a ngai a, lungrual leh langtlang taka kan thawh ho a pawimawh em em a ni. Kan thawh hona a that loh chuan khawtlangin a tuar dawn a, veng nuam kan siam thei dawnlo a ni. Hawh u i tang tlang ang u.

YMA chuan a tum 14 -na a tan Kumpuan thupui ah “RAM LEH HNAM HUMHALH” a hmang leh ta a, YMA thupui ti hlawhtling tur chuan kan zavaia tanrual a pawimawh leh dawn a ni. Kan ram tan YMA hi a hlu em em a, chuvangin, thangthar lo la awmzel turte tan belhtlak ni tura he pawl hi a kal zel theih nan tun a mi te hi i tang sauh sauh ang u.

A tawp ber ah chuan, kan hruaitu hmasa ten Nursery Veng hi veng nuam takah anlo siam tawh thin a, chanhai, riangvai leh mi harsa te tanpui a, lusun hnemtu kan nih hi theihnghilh lovin YMA thuvawn “TANPUINGAITE TANPUI” hi i hlamchhiah lovang u.

YMA Vul zel rawh se.

Leave a Reply