Tax Deducted at Source (TDS)

Ni 19.03.2019 (Thawhleh) zan dar 7:30 khan Vanapa Hall-ah CYMA chuan Aizawl City Area chhunga Branch hrang hrang aiawh paruk leh Branch YMA chanchinbu Editor theuh te SBI in Tax Deducted at Source (TDS) a kalpui tum chungchang in hrilhfiahna hun hmang turin a ko khawm a, Branch 85 atangin mi 537 kal khawm a ni. He inkhawm hi Pu Vanlalruata President CYMA chuan a kaihruai a, Treasurer chu sawm a nih angin Pathian hnen ah tawngtai a inhlanna a nei a, Central YMA zaipawl an zai zawh hnu in Assistant Secretary in hmalak dan tur leh duty na hmun tur a rawn sawi a, chumi hnu ah Tv. Lalhmachhuana General Secretary chu TDS awmzia leh hma lak tawh dan tlangpui sawi tur a sawm a ni a, a thusawi tlangpui chu a hnuai a tarlan ang hi a ni.

Tunhnaia Mizoram leh N.E. State thenkhata SBI leh Private Bank thenkhat ten Tax Deducted at Source (TDS), kalpui an tum chungchang hi kan hriatfiah dan a inchen vek lo thei a. Chuvangin zanin (19.3.2019) hian hmalak dan tur sawiho/inhrilhfiah turin khawpui chhung Branch YMA-te kan han inkokhawm leh chawt mai a ni.

Tax Deducted at Source (TDS) hi enge a nih? : TDS awmzia chu Sec 194A of IT Act 1961 Dan hnuaiah Bank a sum dah Saving/Fix Deposit/Term Deposit atanga kum khata apung interest singkhat (Rs. 10,000/-) emaw, a aia tam a nih chuan TDS 10% cut a ni ang a, Senior Citizen-ah chuan kumkhata a pung (Interest) Rs. 50,000/- aia tam a nihin 10% cut tur a ni ang. PAN CARD nei lo tan phei chuan 20% cut sak tur ani ang tiin Dt. 19.12.2018-a SBI Thuchhuakah tarlan a ni. (Vide Letter No. COMP/SRC/43 Dated 19.12.2018).

Tax Deducted at Source (TDS) lo irh chhuahna chhan: SBI Deputy General Manager (CFO)-in Corporate Centre atanga lehkha a hmuh (No. PBBU/LIMA/RS/2018-19/89 Dated 16.11.2018) N.E.-a SBI Branch thenkhat ten TDS an cut-lohna chhan an zawt a, chumi chhanna tur chuan SBI-in an Consultant (i/c TDS )an rawn hnuah, “Sec 194 A of IT Act hian NE State-a chengte hnenah TDS-ah ngaihnathiamna a pe lo” tiin Consultant in thurawn a pe a, chumi zulzui chuan TDS cut hi SBI hian kalpui a tum ta a ni.

Tax Deducted at Source (TDS) hi cut sak theih kan ni em? Mizote hi Tribal, Tribal Area a cheng leh sum leh pai pawh thawkchhuak kan ni a. Income Tax Act 1961 Sec 10 (26) hian Income Tax awl tur a tih zing a mi kan ni a, TDS cut sak tur kan ni lo niin alang. Pradip Kumar Taye vs Union of India, Guwahati High Court Judgement leh Chandra Mohan Sinku vs Union of India Tripura High Court Judgement pawh hian chiang taka tarlangin Tribal, Specified Area a chengte leh chumi hmuna sum hai lutte chu Income Tax exempt/awl tur a ti a.“Guwahati High Court thutlukna hi Supreme Court-ah Special Leave Petition in Income Tax Department-in an thehlut leh a, chu pawh chu Supreme Court chuan hnawlin, High Court thutlukna hi a pawmpui ta zawk a ni. Tin, a thuhrimah Tribal te TDS – cut sakna tur Notification emaw, order emaw Ministry of Finance emaw Central Board of Direct Tax (CBDT) pawhin a chhuah lo a, Consultant pakhat thurawna SBI in lak/cut a tum mai hi thil dik ani thei lova, Tribal-te chanvo diklo taka laksak tumna a ni.

TDS cut lo turin engtinnge ni ang :
Dt. 19.12.2018-a SBI Thuchhuakin a tarlan danin, TDS cut sak lo tur chuan mimalin Income Tax Return U/s 139 of IT Act hnuaiah a file a ngai a ti a, Form 15G/15H emaw hmanga thehluh tur ati a ni. Tin, Customer-in Income Tax awlna tur atan/TDS cut sak lo turin U/s 197 (1) IT Act 1961 hnuaiah Income Tax Assessing Officer (IAO) hnenah kumkhat atana dilna a siam a ngai bawk Amaherawhchu, Income Tax Office hnai ber pawh Silchar-ah a awm daih avangin, Mizo mipui ten kan banphak vek dawn lo a, hetia dilna siamchawp zel tur chuan keini mizo tribal te hian kan tlin hauh lo ang.Tin, CBDT emaw, ITO atangin emaw Mizo Tribal, Mizorama chengte Income Tax cut sak tur tihna order/notification chhuah a la awm ngai lo bawk a ni.

Dan hnuaiah kan chanvo enge : Mizo Tribal, Mizorama chengte hi Income Tax awl tur kan ni tih Sec 10 (26) of IT Act 1961 leh Sec 197-in a sawi hi danin kan dikna chanvo min pek a ni a, hei hi SBI emaw, tupawhin chhuhsak theih kan ni lo. Tun hunah pawh hian kan chanvo dik tak tihdanglam sak tum kan nih avangin loh theih lohin mizorama SBI office hna thawk theilo a dan alo tul ta ani.

Kan dikna chanvo humhim tura hmalaknate : TDS SBI-in cut sak tura min tih tak chungchang ngaihtuah hian, ni 13.03.2019 khan NGO Co-Ordination Committee meeting neih a ni a, thutlukna siamin kan dikna chanvo humhim tur hian a tul anga hma laka SBI te pawh hnathawk thei lo tura dan a rel a. Chu chu CEC Meeting 16.3.2019 chuan pawmin, YMA pawhin ram pumah hmalak a rel ta a ni. Kan dikna chanvo humhim tur hian Representation pawh siam a niin, hengahte hian thawn vek an ni – Prime Minister of India, Finance Minister, Chief Minister (NE State zawng zawng), MP (NE State zawng zawng), CBDT, SBI (DGM), SBI (Regional Manager).

Tanrualna: Kan hmalaknaah hian tanrual a ngai hle a, Mizo mipui ten tawrh alo tul a, harsatna kan tawk a nih pawhin rei lote chhung chu phunnawi lova hmalam pan tlang turin kan insawmin kan inbeisei a ni.

Ni 20.03.2019 (Nilaini) khan lo rel tawh angin SBI Office a hnathawktu te chu dan an ni a, hemi ni chawhnu dar 1:00 hian CFO, Mumbai atanga kan duh ang te tihhlawhtlinna tur thu kan hmuh tak avangin SBI hnathawktu te dan hna chu tih tawp nghal a ni.

Leave a Reply