THALAITE LEH KAN HMALAM HUN

– Tv. Ch. Lalfamkima
Secretary, Y-Section

Zirlai kan ni emaw, zirna chawlhsan tawh emaw pawh kan ni thei. Engpawhchu lo ni ila, Eng nge ka tih dawn? tih chhanna mumal taka kan pek hian kan hmalam hun thui tak a hril a ni tih kan hre theuh awm e. Tihtur hriatloh leh tihtur neihloh tluka retheihna awlsam hi khawvelah a awm lo tih kan hria. Kan mimal nun, kan khawtlang leh kohhran thleng in, tihtur hrelo leh tihtur neilo te hian min tithuanawp a, beisei an tibo thin. Tihtur neilo/hrelo thalai kan ni em? Zirlai ka ni emaw Zirna chawlhsan tawh pawh ni ila, kan eizawnna te, nupui pasal kan neih hun a kan intunnunna tur thil/hna te kan hi kan buaipui thin em? Nge kan ngaihtuah ngailo? Eng nge kan theihna? Eng nge kan thiam zawng leh tuina zawng? Mahni theuh inzawt ila. Keimahni a theihna leh thiamna lo awm, a tha ber hi a tul a kan hman chhuah duh phawt chuan hlawhtlinna tur bul kan tanna ah, kan tihtur diktak kan tihna tur a kan bul tanna tur a ni.

Tum mumal neih: Zirlai tamtak hi ‘Eng nge nih i tum?’ tiin zawt ila, min chhang theilo fo thin a. Tum mumal tak nei hi kan tlem zawk awm e. Lehkha zir chhoh mawlh mawlh a BA, MA nih a, post awm leh awmlo a zirtirtu nih tum a hmanhlel kan awm ta teuh mai. A zialo hle a ni! Zirtirtu nih tum kan sawiselna lam a nilo a, tum mumal neia lehkha zir that zia kan sawi tumna a ni zawk. IAS, Doctor, Pastor, adt. nih kan tum tlat chuan chumi lam hawi chuan lehkha kan zirlai atanga inbuatsaih in, kan nih tum ah hian kan hlawhtling thei tih kan hriat kha. Zirlai ni tawhlo tan pawh kan awmna veng/khua a awm mai mai a, nupui pasal neih tawp kan tum em? Kan thawh theih tawk leh kan tuina zawng tak thawktur a inbuatsaih kan tum ve dawn lawm ni? Driver, Sipai, Mistiri adt. te pawh kan ni thei. Lehkha kan thiamloh avang hian tuman min hmusit theilo. Lehkhathiam hna neilo leh thawhtur hrelo nih aiin mahni thawhchhuah ringa intodelh ten ngaihsan leh zah an hlawh zawk thin.

Insumtheih/Inthunnun theih : Mi tamtak in kan nih duh leh tum te kan tihtheihloh chhan ah ‘Pawisa kan neilo’ kan ti thin. Hei hi chhuanlam tlinglo leh mi thatchhia te thufing mai a ni! Hrisellohna, Vanduaina leh Rualbanlohna avang chuan kan nih tum kan nilo thei-pawisa kan neihloh vang nilo in! Kan tum leh kan duh chu cheng tamtak sen ralna tur chu a ni ngei mai. Pathian in damna leh hriselna min pek a, Ama rinchhan tlat chunga kan beih chuan kan hlawhchham a phallo. Mahse mihring taka kan tawrh erawh a ngai. I duh i neihna tur chuan insumtheih a, inrenchem a ngai bawk, thawmhnaw nalh lo tak tak i hak pawh a ngai ang. Chhel taka i tawrh a i tum tlat chuan pawisa neihloh vang hian i hlawhchham ngailo ang. Pawisa nei silo hian nawmsak kan thlakhlelh avangin kan nihtur kan nihloh phah a, kan retheih phah thin.

Pathian a innghah : Mi ropui, chhungkaw zahawm leh bawk ang. Heng hi khawi atanga awm nge? Chung hmingthatna chu tuten nge pe? Chhana dang a awmlo heng zawng zawng ah hian Pathian leh keimahni chiah kan pawimawh. Mi zahawm kan nihna te, mi sual kan nihna ‘title’ te hi tuman min pelo, keimahni ngeiin kan thawh/hlen chhuah an ni. Ropuina leh hmingthatna te chu kan finna hmangin kan khel chhuak thei mahna, mahse hnuglama nuihzat kan hlawh thin. Kan nun in a nun chhuah a nih erawh chuan Pathian leh mihringten min chawimawi thin. Hei hi kan hre reng ang Pathian leh keimahni chauh hi mi ropui, mi hlawhtling leh mi chhuanawm kan nih theihna in a pawimawh te chu an ni. Kan tum ang nga, kan la ni ngei bawk ang Pathian zarah.

Leave a Reply