THAWHRIMNA

– ZOKUNGA, Y-Section

Kan ram leh hnam a dam khawchhuahna atana thil pawimawh, Sawrkar, Kohhran, Pawl hrang hrang leh chhungkua pawhin an/kan ngaih pawimawh em em “Zirna uar kum” tih chu Mizoram a pawl (NGO) lian ber YMA in kumpuan atan kan hmang ta rup mai a. Hei hi a lawmawm in rahchhuah duhawm tak pawh a chhuah ngei a beiseiawm hle a ni.

Zirna kawng a hlawhtling tur hian tih tur leh tih loh tur thil tamtak a awm ngei ang. Chung zinga pawimawh ber leh a laimu ber chu Tirhkoh Paula’n (I Korinth 9:26-27) “Chutichuan tiamchin lam panin ka tlan ngat ngat a ni, boruak mai hnek lovin mahni ka inhnek zawk thin a, chuvang chuan ka taksa ka tichhel a, ka thuhnuaiah ka dah tawh a ni, chutilochuan mi dangte hnena ka tlangaupui hnu pawhin eng emaw tiin keimah ngei hi paih thlakin ka awm dah ang e” a lo tih hi a ni awm e. Tirhkoh Paula’n a lo sawi ang ngei hian zirna kawngahte, thil dangah pawh hlawhtling tur chuan “thawhrimna” hi a pawimawh hmasa fo reng a ni.

Scientist ropui Sir Isaac Newton chuan “thil hmuhchhuah hlu tham ka nei ve ngâi anih chuan, chu thil chu ka talent dawn avanga ka hmuhchhuah ni lovin, dawhthei tak a ka beih tauh tauhna rahchhuah a ni zawk ngei ang” a ti a. Vawiin thlenga a tel lova kan awm theih tak der loh Electric bulb ti engtu thirzaisin (filament) hmu chhuaktu Thomas Alva Edison chuan “hlawhtlinna a zâ a sawmkua pakua chu thawhrimna rahchhuah a ni a, zâ a pakhat erawhchu pianpui a ni” a lo ti ve bawk a. Tirhkoh Paula thusawi te, Sir Isaac Newton leh Thomas Alva Edison te thusawi hi kawh thuhmun, tawngkam erawh danglam mai a ni a. He an thusawi atang mai pawh hian hlawhtling tur chuan “thawhrimna” a pawimawh zia kan hre thei awm e.

Zirlai kan nih a, YMA member kan nih bawk si chuan YMA kumpuan “Zirna uar kum” hi a hlawhtlin ngei theih nan mawhphurhna pawimawh tak kan kovah a innghat a. Tirhkoh Paula bawkin (Galatia 6:7) “Miin a theh apiang chumi vek chu a seng bawk dawn si a” a lo tih hi zirna kawng kan zawhnaah kan vawn reng a pawimawh hle mai. Kan thawhrim phawt chuan hlawhtlinna hi kan ban phak maiah hian a awm reng a. Hlawhtling tur hian mi tlem te vannei bik chu an awm a ni mai thei, mahse, a tak takah chuan mi hlawhtling lo ni ta te hi rimtaka bei fan fan tute an ni fo zawk a ni tih hi i hre mawlh teh ang u.

Zirtirna dik ziktluak lo kanin fah fo mai chu “Lehkha thiam BA/MA pawh ni mah ila, Sawrkar hna hian min daih seng dawn chuang lo” tih hi a ni. Rimtak a bei tauh tauh a, mi chunga in hlangkai thei te tan chuan Central a ni emaw, State a ni emaw, Sawrkar hnaruak hi a awm reng zawk dawn a ni tih hria ila, chumi chang thei tur erawh chuan “thawhrimna” bawk hi kan ngaihpawimawh hmasak erawh a ngai ngei ang.

Infiam mi emaw, sumdawng emaw, kut hnathawk emaw, Sawrkar hnathawk emaw pawh ni ila, lehkha thiam (zirna uar) nih hi a pawimawh em em reng dawn a, YMA General Conference meuhin YMA kumpuan atana “Zirna uar kum” a puang pawh hi thil tihawm reng a lo ni. Chu kumpuan ti hlawhtling tura mawhphurhna pawimawh tak mai neitute chu kei ni YMA member, zirlai ni mek bawk te hi kan ni lo thei lova, kan hmanraw hman tur thil tamtak zinga a pawimawh ber pakhat “thawhrimna” hi tun atang ngei hian atakin i nunpui mawlh teh ang u.

Nang, thatchhepa, fanghmir tih dante chhut la, fing rawh, anni chuan lal te, hotu te, roreltu te nei lovin, nipuiah chaw an chhek khawm a, a seng hunin an ei tur te an seng khawm thin”. (Thufingte 6:6-8)

Leave a Reply