THILBO CHUNGCHANG

Thil bo chungchang report a awm leh tan ta, veng mipuite kan inthlahdah nge, kan fimkhur tawk lo. Tun thla chhung ringawt pawh khan inrawk sawi tur a awm nual mai. JAC te zantin duty in feh chhuak mahse, heng ruihhlo ngaite hi ven sen an ni chuang lo. Chuvangin, veng mipuite kan inthlahdah loh hi a pawimawh ber. Hei aia kan tanrual a ngai tak meuh meuh a ni.

CCTV te kan la ngah loh avangin heng ruk ruk chingte tan hian hun tha ala in hawng zau viau a ni tih hriain infinchhuah a kan invenpui a ngai khawp mai. Kan mikhual lo lenglut te kan inmitmei tawn a kan tanrual a ngai hle a ni.

Chhun leh zanin heng ruk ruk thil te hi a tidanglam chuang lo a, engtiklai pawha kan inven, kan inrinreng a ngai tak meuh meuh a ni. Thil ruk chingho thil ruk dan tlangpui ah chuan zinglam muttui lai te, zan reh hun lai te, chhun mipui zik mup mup laite leh chhun rehlai thawm rehlai te ani tlangpui a, a thenchuan hriam hrei an kengtel a, tunlaiah tak chuan rukruk hmang ho hian hriamhrei an chelek tlangpui avangin fimkhur pawh angai bikzual a ni.

Hemi kawngah hian Joint Action Committee te an tha tichak zawnga kan in support thiam angai viau mai. Mahni indatha mai lovin, heng tawhsualna lakah hian kan fihlim loh hun alo thleng ve mai thei, tuman kan hmalam hun kan hre vek lo. Chuvangin, khawtlang duhloh leh khap thil reng rengah a hmasa berah chuan veng mipuite a taka zawm tur leh ke pen hmasa tur kan ni ngawih ngawih tih hi i hre thar leh ang u.

Rukruk leh ruihhlo chungchangah hian tunlai tak hian Aizawl khawpui chanchin thar chi hrang hrangah a mualpho zawngin veng hming alang ta fo mai a, ruihhlo zawrh man leh inrawk chungchanga Nursery Veng tih lo lang ta zauh zauh mai hi zahthlakin a mualpho thlak hle a ni. Hetiang alo thlen hian veng mipuite kan lung a awilo fo, mahse kan inthlahdah rah kan seng ani tih hi i hre thar leh mawlh teh ang u.

Chutihrualin, kan vengchhung atanga hnawhchhuah tawh te, ruk ruk thil emaw ruihhlo zawrh chungchanga man an tawhin Nursery veng tih hming an inputtir leh mai thin. Hetiang hi a awm leh anih chuan mipuite pawh hian Khawtlang hruaitute zawtfiahin, Media lamah chhan ve nak nak tur, hetiang ang kawngah pawh hian mipuite kan tanrual angai dawn ta khawp mai, tun tuma SRS Office rawk chungchangah pawh khan veng mipuite inenfiahna tur tha tak min neihtir niin a lang. Tin, khawtlang hruaitute pawhin bengsika tih tak meuh meuh a harsatna kan tawh mek te hmachhawn thiam turin rilru kan sen a ngai ta a ni.

Leave a Reply