THLANMUAL COMMITTEE NEIH A NI

Ni 20.9.2011 (Thawhleh) zana ruahsur nasatak avang khan kan veng thlanmual thar zawkah lei a min a. He leimin avang hian thlan lungrem 23 zet a chhiat bakah thlan dang 15 zet chu a khi bawk a ni. Leiminna hmun hi Thlanmual Step zawh chhoh a ding lam, Step atanga thlan 5/6-na vel, len chhak lam atanga chhiar a 4/5 vel a mi a ni ber a. Leiminna lam Step ding lamah hian tunah thlan 80 (vel) a awm mek a ni.

Ni 21.9.2011 (Nilaini) zinga thlanmual leimin hi hriat anih veleh Thlanmual Committee hruaitute hriattir nghal an ni a, Committee Member a thei theiin thlanmual hi pan nghal a ni. Veng pathum Local Council hruaitu te, Branch YMA hruaitu te leh Thlanmual Committee Member ten a theih ang ang in Sawrkar lamah Silpoline te dil nghal a ni a. Ni 21.9.2011 tlai dar 3:30-ah Branch pathum YMA Executive Committee Member ten a huhova hnatlang neih nghal niin Step ding lam panga thlan awm zawng zawng chu tha takin Silpoline a khuh fel a ni.

Ni 22.9.2011 (Ningani) zanah Bungkawn Branch YMA Committee Room-ah Thlanmual leimin chung changa hmalak zui dan tur ngaihtuahin Emergency Meeting neih a ni a. He hunah hian Bialtu MLA Pu R.Selthuama leh AMC Chairman Pu C.T.Zakhuma te chuan Thlanmual Committee Advisers an nih angin Committee an ho thei a ni. Thlanmual Committee thurel tlangpuite:

(1) A theih ang a hmain leiminna hmun (len 6-na leh len 7-na inkar)-ah rinawm taka lungrem nise, hemi atan hian sawrkar Department hrang hrang leh AMC lamah te a remchan dan angin Fund awm thei ang te dil nise. Sawrkar Department lam atanga Fund hmuh mai a harsa deuh anih pawhin Bialtu MLA-in MLA Fund atanga lungrem hna thawh theih dan tur ngaihtuah a huam avangin Committee chuan lawmawm a tiin thlamuan thlak a ti hle a ni.

(2) Step ding lam pangah hian lungrem te siam zawh anih hma chuan inphum chhunzawm a remchang rih dawn lovin a hriat a, hei vang hian chhiat tawh leh velah tuna in phum mekna Step ding lam chu kalsan rihin veilamah len thar a thlan laih tan rih phawt nise tih a ni.

(3) Hun lo kal zel tur atan hetiang chhiatna pumpelh anih theihnan Site Plan tha tak siam nise tih a ni a, a tul angin mithiam zawkte ruaiin drain, step, etc. siam dan ngaihtuah nise tih a ni.

(4) Ram renchem avanga thlan in hnaih thei ang ber a laih thin chu chhiatna/leimin te pumpelh anih theihnan tunaia in hlat deuh hretin thlan laih thin tawh nise tih a ni a, thlan inkar hlat zawng atan hian Ft. 1.50 emaw Ft. 2 emaw nise tih a ni a, a hmun a enfel hnuah a hlat zawng tur hi bithliah fel nise tih a ni.

Bialtu MLA te, AMC Chairman te, Veng pathum LC hruaitu te, Branch pathum YMA leh Thlanmual Committee hmalakna te in Thlanmual a leimin avanga harsatna kan tawh mek hi a theih ang ang a sutkian tum a hmalak mek a ni a. Hei vang hian Veng pathum a tanga helai hmun a ruang lo in dah tawh te lo chiai mai lo tur leh thlamuangtaka lo awm turin Thlanmual Committee chuan a beisei a, thlanlung rem, etc. siam that leh chung changah pawh Committee hmalakna lo ngaichang hram hram turin mitin Thlanmual Committee chuan min ngen a ni.

Leave a Reply