THLAWHTHEIHNA KHA

-Hriata Fanai (L)

Khatia Police ho ni mai a ka hriat in, Kross a khenbeh ve ni âwm tak a rei ngial min Zangphar tir chhûng kha a rei ka ti e. Racket tereuhte ni mai a ka hriat khân min lo dep kual a, ka kapkâr chung a rawn thleng tih khân ka zâm chhiat tawh nen a kiu ta chiam mai a. Thlawhtheihna thla ni mai a ka hriat, a hma vir kha ka fapa in tlanvir ah hmang se ti a ka suangtuah lai chu a tawp ta chat mai, Ka khâwl tha, Hmavir dik ve chungah tak khan an khâwl thil ri kha a tâwp bawk si a. Ka ngaihtuahna a buai ru ta, ka kekawrte hâk rawng a dik lo em ni ang? Nge a kâwng elastik lam thâwl ru deuh hi nge ni ang? Tih ka inzâwt rilru a, thlan vawi khatna a far hman. A lo ni miah lo, ka kawnghren bungle zâwk thir a man a ni tih min hrilhfiah khan, kha bel thum bel pa kha ka va kuah teuh tak e aw..! ka insûm viau a ni. A hmel erawh chhinchhiah a har lutuk lo e ka tân chuan. Ka hre reng ang che Hajur. Salute !!

Thlawhtheihna a ri vut vut mai a, Police hmeichhe hmel chhuanawm fahran khan ka tiang hawl chunga thlawhtheihna chuang ve ngei tur zinga ka thu min hmuh khan, “Ka Pu Wheel Chair i mamawh em, thlawhna thleng sâwn ka nawr phei ang che aw” min han ti mai chuh! “Ka thin tirim theilo te, hmanah khan ngatinge kan lo inhriat loh le” han tih mai kha ka va nâp tak êm! A âwka chhuak kha ka tân a mawi a, a hmêl kha ka ngaina nghal a, ka chhinchhiah rûk ang khân min chhinchhiah ru ve angem le. Amah ka hnar hauh lo a, KA PU min tihna leh ka tân a inhuamna chu ka hnar ta nge nge a.

Chuang ve tur dangin confi hmel deuh in min kal pel fua fua a, ka tiang hawl nge bai keimah tih pawh ka inhre tawh lo, ka phawk chhuak phei zawt zawt ni maiin ka inhria. A chhan pawh ka fapa DUATA khan Thlawhtheihna hma vir dik deuh kha tlanvir pui a châk thin si a, a bula va belh chian kha ka duh tlat. Ka va thleng phei tep a, awi a ri ring lutuk, ka hmui hian awm ngaihna a hre lo a, chhim thlipui nge hmâr thlipui tih lam a hawi tawh lo. Zo thlifîm in min thawi dam a, min chhem nui tih chu tih sa loh loh a ni e..

Thlawhtheihna hmavir thli kher kha chuan e ka engkim hi a chhêm khawlo ni a ka inhriat rilrûk lai chuan, hmeichhe hmeltha zet tho khan, “Ka pu helamah aw” mi lo tih pah in ka Air ticket, rawng pawl ngei kha a lo ban a. “Ka pu min tih fo chu le” tih ngaihtuah a, lâwm ru viau lo chung chuan thlawhtheihna kawngka pan chuan ka bai chho ve ta a. “Ka pu” min ti tu ngei kha hawi lêt pah in ka zuk bye bye lêt ve ngei a, min lo nuih seih mai, hei kher hi chu ka sawi tum loh, sawi ka châk si. Tuma hriatpui loh a ka vawn tlat tur a ni. “Ka lo haw hunah lo Duty leh rawh aw” ka tih kha a hria angem le aw. Mahse a uniform rawng ang ha kha an tam si a, engpawh ni se Duty fel tak, ngainatawm tak a ni mawlh e.

“Le, thlawhna kawngka a lo inhawng huau mai a, Air Hostess pahnih, pian nalh, hmeltha bawk si khân mi lo nuih leh seih a, (Kei akara tiang pahnih hawl lehnghal kha..) Midang kha chuan an thutna an zawng aniang chu chunglam a êng vêt vêt thei bula eng engemaw number kha an melh zauh zauh a, kei chu ka ding deuh det a. Ka tiang hawl kha an rawn pal leh ngawt thin bawk. Mahse, ka tiang, kimki taka ka dah chêp ve viau kha an ngaihtuah lo ka ti hman deuh a, chu aimah chuan an kalna kha an en lo ka tih deuh nen. Lengpui Airport kawt ata tawh khawlum ûr hmin emaw tih mai tawh tura lum ti leh sahal ru tawh, Thlawhtheihna chhungah Air condition an tia mawni chhungah kan han thu lût vawt ruih mai chu thak loh tur pui pui a ka ngaih, ka ngal leh chawn thak ta riau te kha ka hiat ru ang sauh sauh a, chung lamah a rawn khu chhuak ruai ruai a, a vâwt seng seng bawk a, An Thlawhtheihna hian sanitizer Spray a chhawm anih hi ka ti rilru a, ka va thu confi tak êm ve aw. A boruak kha a nuam e.

Lengpui Airport siam tantirh, an hawn hma fe si a Bike a kan zuk intlansiakna thin ngei mai ah khan. Min phur phei ve lauh lauh ta mai a. Metal road kha ka zuk en a, “Thlawhtheihna hi eng teh ual a lo ni lo a nih hi” ti rilru in ka nui mai mai a. Sawtah khan min va thlenpui a. Thelret/Center Fresh, ka fanu min pek ngei kha ka thial chuap chuap a. Kan lêt phei ta ruau ruau mai a, a chak tulh2 ta mai. Ka thelrêt thial ka lem lai pawh ka hre ta lo. Ka mawng nghahna, ka thut nghehna ngei kha a nghet ta tlat lo, thih thlamuanna nei tan pawh ding chunga Lalpa faka din hluai ngai ang chi kha niin ka hria a. Kawnghren khan min kilh bet tlat bawk si a, Thlawhtheihna khalhtu kha ka thianpa, Ka U ni bawk SAD Driver senior, (Tunah an Asst supervisor emaw ni ta) Pu Duhzuala tal chu ni se ka thla a muang tur.. A nih loh vek pawh in Civil Hospital lama an Driver senior Pa Mawia tal ni se, thut pangngai in ka thu ve mai tur hi a ni. Mawng ka hung hlei thei lo a, chunglamah lu han nghahchhan kha a sâng viau bawk si a.

Thlawhtheihna chhungah, thu si lo, ding ngil si lo, leh a chung lam si tak tak2 chuang si lova ka’n awm chu le. Kan thlawh tantirh khân, ka ram chin hriat chian LAD picnic Spot te, Ka thianpa Engzauva, Zaithiam (Lubuk of Lengpui khua) te huan lo ram ka thlir anga, ram ruak nei lo anga ka bula an insawi kha ka hmu ru khiau anga, “Thlawhtheihna atang pawn ka zuk hmu thei vek alawm” tiin ka dil lui ve khawp ang ka tih rilrûk kha. Awi awi awi. Tu ram Nge? eng huan nge, tih vel hlir tur kha ka zuk hmuh chu a ni.. Sahuan leh huan lo awmna ka hre lo a, Bible thu in, “I dai chin apiang i ram a ni zel ang” a tih kha ka zuk dai miau si lova, ram neih ve ka hlat dan tur te ka mgaihtuah nasa mai.

Ka rilru a awm ta chu, chhum chungah ka thlawk ve ngei si a, lei chung si ah, Vanram han kai pha si lo khân tla thut ta ila, khawi hmunah nge? khawi ramah nge? kei leilunglungah pawh ro khawl khawm nei lo hi ka châmbân tâk ang tih kha a ni. Leiah ro khâwl khâwm tur nei si lo, Vân ah khawlkhâwm tur nei chuang bawk si lo hian ka lo thengthaw nuam ve ngawt a ni angem? Mahni leh mahni inzawhna chuan ka khat ru ta a..

Lei leh van siamtu hian VANRAM leh HREMHMUN a siam miau si a, khawi ah chuan nge ka chuanna THLAWHTHEIHNA NGEI HIAN MIN TUM PUI TÂK ANG!!? tih hi a ni e.

Leave a Reply