THUCHAH

– C. Lalchhanhima, President, NYMA

Kum 2021 chu Pathian khawngaihna leh kaihhruai-na in kan lo hmang zo ve leh dawn ta reng mai le. YMA Member zawng zawng te leh khawtlang mipuite thinlung takin chibai ka buk a che u. Hriselna tha nen, Krismas nuam taka hmanga theuh tur leh kumthar 2022 hi dam taka thleng theuh turin ka duhsak che u a. In tan malsawmna kum lo ni theuh rawh se tiin duhsakna ka hlan a che u.

Kum 2021 kan hmanral mekah hian mi tam takin chatuan ram min pansan a, YMA Hruaitu leh mi tangkai uiawm tak tak, khawtlang leh ram tana chhenfakawm tak tak engemaw zatin mual min liansan ta, a khawhar thlak zawnga ngaihtuah pheichuan nuih a har thin. Chuan keini erawh kan fel bik vang ni hauh loin, tun hun thleng damin kan la awm hi Lalpa zahngaihna a ni tih hria a, a lam kan hawi hi kan tih tur leh kan bat a ni.Hun a lo kal zel a, YMA Hruaitute an lo liam a, mithar in a fawng kan lo vuan zel angin, kei ngei pawh YMA Branch-ah ka hun hnuhnung ka hun tawp a lo ni ve ta reng mai. Kum pawimawh tak ka diary-a chuang reng tawh tur hun ngaihawm leh hlu a lo ni dawn ta.

YMA hi midangte tana malsawmna nihna kawng lian leh zau ber a nih avangin member pawh kan thahnem ta hle mai, report hnuhnung berah chuan YMA member hi 4,68,881 kan awm ta. YMA hi a hluin a ropui a, Member ten theihtawp chhuaha kan ram leh hnam tan kan tih a ngai hle mai. Aia u zawkten kan nun kan uluk a, Naupang zawk te zirtirna tura kan tawngkam leh chezia kan fimkhur a ngaiin a tul hle bawk. Vawikhat chu Zokhua atangin kan chhung ten artui lai min rawn pe ve a , a chhuak palh hlauh mai a, man tumin ka um a, Tleirawl 3 te an lo kal a, min hualpuia min puih ve mai ka lo rin nen, “Man a har ngawt ang,” tiin min kal pel ta daih mai a, khatiang ang nun, midang puih ngai han puih mai nachang hrelo, puih ngai te puilo a inthiam hliah hliah nun te kha zohnahthlak chhul chhuak kan lo tam tan ta hle mai. Heng kan Zonun ze mawi tlawmngaihna, sem sem dam dam ei bil thi thi hi kan thalai zawkte, nau zawkteah a lo nunchhuahpui zel theihna tur in, rual u te leh hruaituten tan kan lak a ngai hle mai, chu chuan kan vengchhung nawmna leh nawmlohna pawh thui takin a hril dawn niin a lang.

YMA – Pawl lian leh ropui, member ngah tak hi kan innghahna Pathian anih avangin, vawiin thleng hian YMA ralrel a sual ngailo kan lo tih thin kha a takin kan la chang zel te hi a lawmawm hle a ni.

Mosia pawh khan Pathian mit chu Israel te chungah a fuk reng tur thu a sawi angin, tunah pawh hian Pathian engkimtithei, engkim hria, khawi kipa awm chuan min thlir reng dawn a, a thu loin engmah kan ti thei si lova. YMA member ten kan tihtur theuh tha tak leh dik taka kan tih theih nan, YMA Member nih ngawt duh tawk lo a, kan vela midangte tana tha leh zuala hun hman hi a taka kan nunpui theuh theih nan mimal tin kan pawimawh angin tan lak kan ngai a ni. Kan hmalam hun kan hre lo, Kumthar 2022 pawh hi hripuiin min la chim reng a ni thei e, Engpawhnise, kan awm hmunah theuh rinawmna leh taihmakna kan vawn tlat chuan, harsatna, manganna pawh tawk ila khawtlangnun hi a hrehawm ngai lo ang.

Khawtlang hmasawnna hrang hrang kan kuta awm, khawtlang ro dinna kawnga a fawng vuantuten hei hi theihnghilh lo ila. Pawl leh hruaituten an mamawh em em tawngka chauh nilo, a tak a thawk thin nih hi kumthar 2022- ah hian kan mamawh a, chu chu hriaa zawm tlatin, kei leh nangin khawtlang hmangaihna kan nunpui loh chuan tunge, khawtlang tan ding ta ang?

Executive Committee – Nursery Veng YMA hian Sub- Committee hrang hrang pawimawh tak tak kan nei a, chung Committee khaikhawm tu chu Executive Committee a awm a. Heng Committee hrang hrang pawimawh tak takte hi Nursery Veng YMA hmel lanna anih tlat avangin a pawimawh em em a ni. Committee Member ten member tam tak ai kan awh a ni tih hria a, taima tak leh thinlung taka kan nihna kan duty kan hlen thin a tul hle. Chu chuan YMA zahawmna, hmingthatna, hmingchhiatna Committee chhunga member teah a innghat lian hle a ni. Chuvangin, thawhhona tha kal dan fel fai tanrual a ngai hle a ni. Committee mawngpawp awm theiah te rinawm taka member ten rilru kan put a ngai hle.YMA hi a lo zahawm a, hmalam a pan zel theihna turin nang leh kei hi kan pawimawh a ni.

Kohhranin tihtur leh rawngbawlna kan neih chi hrang hrang Pathian thu leh hla kan ngaihthlak te hi a hman chhuahna nasa ber leh tangkai ber chu YMA hi a ni. A chhan chu a huang a zau a, a huam a tam ber vang a ni. Phut let nei hauh lo a, midang tana hun leh theihna hlan thintu YMA hi a a va ropui em, chan pawh huama rinawm taka khawtlang leh ram tana hrehawm leh hah pawh sawilo a, che thin YMA hi a va ropuiin chawimawi phu a va ni teh lul em.

Kan hriat theuh angin, Kum 2022 kumthar YMA hruaitu thlan hun kan lo hnaih leh ta hle mai. Ni 3, December zanah Nursery Veng YMA hruaitu tur kan thlang leh dawn a. Heta kan hruaitu thlanthar te hi tute pawh nise theihtawp a Support tur leh an hruaina kawngah tanpuitu, tiphurtu, tichaktu nih vek tum ila, a sawisel zawng leh a kalh zawnga rilru pu loin veng tana thawh hona tha a awm theih nan theihtawp chhuahpui theih turin Memberten kan rilru ilo hawng ang u. Kan Khawtlang Hruaitu LC lam a ni emaw YMA lam a ni emaw, Veng mi kan nihna angin kan thawhpui thiam, kan tanpui thiam hi khua leh tui tha nihna a ni tih hi Veng mipui ten hre thar ila. LC lam leh YMA lamah pawh thawhhona tha a awm zel theihna turin, kan tan tlan a tul tak zet zet a ni. Chu chuan kan veng hlimthla mawi a ti lang thin dawn a ni.

A tawp berah chuan, tlinglo taka kum 10 chhung zet in zarah Hruaitu ka ni ve hi ka lawm a, ka hruai ve chhung vawiin ni thleng hian in zarah kei tehlul hi mualpho loin ka awm ve a, ka lawm tak zet zet a. A bik takin OB ka thawhpui te chungah ka lawm tak zet a, ka tlin lohnaah min awi nung a, ka thiam lohnaah min hliah khuh thin hi, lawmthu sawilo thei niin ka in hre lo a ni. Kan thawhho chhung zawnga min thawhpui danah te ka lungawiin nuam ka ti em em a. Kan thawhho chhunga in rilru ka lo hliam leh in pawi ka lo sawi-ah in mi ngaihdamna ka ngen bawk a, in kal leh zelna turah hriselna tha nen Lalpan awmpuiin YMA leh veng tan in finna leh theihna tha tak in hman zel theih nan, hriselna tha in neih zel theihna turin duhsakna ka hlan a che u.Chutiang zelin member zawng te Krismas leh kumthar hlim taka hmang tur leh YMA hlut a, tang zel turin duhsakna ka hlan a che u.

YMA vul zel rawh se.

Leave a Reply