THUPUI : THAWHLEHNA THUPUAN

Bible chhiar : Matthaia 28:1-7

– Rev. Lalthankhuma, Nursery Veng.

He thawhlehna Ni lawmawmah hian Kristian zawng zawngte chibai ule. Thihna hneha kan Lal Isua thawhlehna hian thilthar lawmawm tak tak a rawn thlen a, chung zinga a pawimawh ber chu Kristiante innghahna Bible thu zawng zawng tifamkimtu, awmze neihtirtu a nihna hi a ni. ”Tin Krista kha kaihthawhin a awm loh chuan in rin chu engmah lo a ni ang a, in sualna ah chuan in la awm fo a ni ang. Chuti a nih chuan Krista a muhil tawhte kha an boral ta a ni ang.”( 1 Kor 15: 17,18). He thawhlehna hian Krista rawngbawlna pumpui kha a tak a nihzia a rawn lan tir ta ani. He thawhlehna hian chiang taka lantir a neih zinga a pawimawh zual pathum chauh lo tarlang ila.

1. Thihna aiin nunna a chak zawk tih a tarlang. Mihring tawp hlenna chu thihna chauh hi ni a ngai thintu khawvel mihringte hnenah chuan thihna aiin nunna a chak zawk tih a rawn lantir a, khawvel hnenah chuan thih hnu a nun zel beiseina a rawn siam sak ta ani. ”Tupawh mi ring chu thi mahsela a nung reng ang, nung a piangin mi ring chu kumkhuain an thi lovang” ( Joh 11: 25-26) Amah kan Lal Isua ngeiin a sawite hian a ti chiang hle ani. Sual vanga taksa leh thlarau thihna ah ngei chuan Amah ringtu zawng zawngte tan A thawhleh ruala thihna hnehna nun tak, thlaraua nunna chu kan lo nei thei ta. Hebrai ziaktu in “Thih hlauh vanga dam chhunga bawia awm zawng zawngte chu a chhan chhuah theihna turin”(2:15) ti a a sawi ang khan.

2. Tha chu thalo aiin a chak zawk tih a puang. Amah an tihhlum theihna tura a chunga dawt a an hekna zawng zawngte kha he thawhlehna hian a diklohzia a rawn puang ta a ni. Tha chu Pathian zia a ni a, tha lo chu mihring zia a ni. A tha luan ralna mihring nunah chuan, chu nunah ngei chuan a tha kung chu a rawn phunin chatuan daiha para rah reng turin a rawn siam thar ta. A thawhlehna nun tawmpuitu nun chu sawi vak vakah a tawp ve lova, thilthatihin an nunah Pathian ram nun leh zia chu a lang chhuak reng thin ani. Thalo lalna mihring nunah hian he THAWHLEHNA NI hian ring takin thusawi mawlh rawh se.’ Thiltha ti atan Krista Isuaah chuan siama awmin Ama kut chhuak kan ni si a.’

3. Chunglam thil leh leilam thil danglamna a ti chiang ta. A thawhleh hnua a zirtirte hnenah leh midangte hnena a in lar lai pawh khan an hriatchian theih dan ber turin a inlar thin a. Amah kha van atanga lo chhuk vanlam mi a ni reng ani.Unau duh tak Isua hriat chian hi kan ram hian kan va mamawh em. Hetianga van lam thil leh leilam thil chawhpawlh nuaia kan khawsak dan hian lung zawng ati awi mawlh lo a ni. Chunglam thil Pathian duhdan leh lei lam thil khawvel thil thliar fiah theihna chu a thawhlehna nun chuan min hriat chian tir vek tawh, keimahniah hian engkim a tawp zawk a sin. Tumkhat chu kan chuanna Motor chu kawnlai takah hian a thi tlat mai a, a thi chiang kher mai, tihngaihna a awm miah lo, kan chuanna motor ang chiah chu a lo kal ta hlauh mai a, inrual takin an din dun tira, a battery kha an in zawmtir a, tichuan an han start rual ta a, an nung dun ta vut vut mai a ni. Keini pawh chu kan tum ram thlengin kan kal ve thei ta. Deh nun nunna pek a nih chu. He thawhehna ni hian nang leh kei pawh hi min dep nung ve tawh, Ama nunna chuan kan nung tawh a, sual hnehna chakna, thianghlim tura chakna, thil tha ti a nung tlat tura chakna kan lo nei ta ni.

(Rev. Lalthankhuma, tlawmngaia Easter Sunday thuchah ziaktura kan sawmna ngai pawimawh a, thuchah tha tak min ziah sak avangin lawmthu kan sawi tak meuh meuh a ni.Veng chhunga thu leh hla lam tui mi te ke rawn pen chhuak a thu tha tak tak rawn ziak turin Nursery Aw Editorial Board chuan kan sawm nawn leh a che u)

Leave a Reply