TIME MANAGEMENT

– Remrema Pa

“Hmeichhe finin tuikhur ral a kai lo”
“Nu ril tamin chawbel a len a, Pa ril tamin thlawhhma a zauh”

Kan Mizo tunhma nunah a chunga kan sawi te khi tawngkauchheh lar tak an ni. Sawifiah vak ngai lova chiang sa ani chungin tunlai hunah ala ni chiah em tihte sawi pahin kan sawi zau hlek dawn a ni.

Pi leh Pu hunah khawtinah Tuikhur an nei ngei ngei a, chuta mi chu hmeichhiain chawiin chhungkaw ei an rel thin. Khaw thenkhat chuan hnai tetea an neih laiin thenkhat erawh chuan khur hnai leh hla te pawh an nei bawk awm e.

A hnai emaw a hla emaw pawh nise ‘Hmeichhe finin tuikhur ral a kai lo’ tih tawngkauchheh hi engvanga nei nge an nih ang. Mipa chuan ram hna an thawh avangin tui an chawi ve ngai lo, hmeichhe mawhphurhna a ni. Zing buh den leh zing tui chawi kha hmeichhe tan er ngial tham ani ve tlat. Zing tui tling chawi hman loh hlau reng rengin mutmu pawh an tuah tha hman mang lova, an vei a sawi te pawh an lo sawi zing ve a nia nge, chuvang chuan upaten hmeichhia chuan zinga an tui chawi tur bak engmah an ngaihtuah lo tih sawi nan he tawngkauchheh hi an lo chhep chhuak ta a ni ang.

Ni e, Mizote hi kan ngaihtuahna hi a thui lo khawp reng a ni. Zep nak emaw khitianga a ngaihtuah thui zawk inti, mipa te pawhin “Nu ril tamin chawbel a len a, Pa ril tamin thlawhhma a zauh” tih tawngkauchheh atang hian a hmalam hun kum khat bak an ngaihtuah phak bik loh zia a ti chiang veleh tho a ni. Chhe chhawnga te vai dawr an sawi ang chauh kan lo nih chu.

Tunlai khawvel changkang tawh, mipa leh hmeichhia intluk thuak thuak tawhnaah hian hetiang rilru tawi hi paih tawh ila. Kan hmalam hun kum 10 tal thlir thiamin kan hun ruahman zir hram hram ila i inbuatsaih sauh sauh ang u.

Nursery vengah hian Time Management thiam apiang an dingchang chho zel dawn, hun rei loteah kan awh leh entawn an rawn ni mai dawn a ni. Tu nih tur bik mah a ni lo tih hriain tun atangin i hun ruahman rawh le.

Leave a Reply