TLAWMNGAIHNA

Tlawmngaihna hi a hming atang ngawt pawhin a mawi a, awm nem leh chaklo zawkte phei chuan kan thlamuanpui hle thin. Hei hi Mizote min chawimawitu, min thlamuantu a nih avang hian, mi tamtak phei chuan, mahni ta bil ang hiala lo hauh ta mai te pawh kan awm bawk thin. He thumal hi a awmzia kan hriat tlan thum lai hian, a nihna tak tarchhuah leh pholan erawh chu mithiamte pawhin harsa an lo ti ve tho mai a, He tiang taka thuril a nih vang hian, ziah bawrhban zawkte pawh a hlauhawm thei hial a ni.

He thumal pakhat ‘Tlawmngaihna’ ah hian, mizo hnam rohlu chu a inphum tlat a. Chung zemawi leh nunphung tha kan tih, rinawmna, chhelna, taihmakna, huaisenna, hawihhawmna te bakah, Bible in ‘ Nang malsawmna ni ang che ‘ a tihte thleng hian a khuap kim vek a ni. Hetah zet hi chuan hlemhletnate, chapona te, itsikna te, dawngdahna te midang erna leh insawichhiatna reng rengin hmun a chang lo a, a dera thiltih leh nun te nen phei chuan, engtik khawtikah mah a inrem thei mawlh lovang. Chuti taka nuntlawm leh hnuaihnung anga lang chu hlawkna a hnekin channa hlirin a hmuak a, lei hringnunah a tlawm lu hret lo maw?.. ti te pawhin a ngaih theih rum rum a ni. Mahse chuti taka nun tlawm chu min thlahtu, pi leh pu te khan an nunah silhin an lo feng a, tunlai huna ngaia kan neih tak deuh mai, inchuh, innek buai, infinkhallh tih ang rengte hi chu a awm pawh a awm ngai lo reng reng a ni.

Engkim mai hi a tuikang nghak raihin ‘nangin chang zawk rawh’ tih chu tih dan phung rengah an ngai zawk a ni.
Mi thenkhat, tlawmngai ni pha chiah silo, tlawmngai anga lan tum, phut let leh tai nei ran chunga intitlawmngai chawp hmuh tur an awm ta zauh zauh a, thangtharte duhsaka kawng dika kaihhruai lam ai mahin a tlachawpa nun leh
khawsak chu an zeina zawng tak a ni mah thin. Mi thenkhat ten mi tlawmngai tak tak te hmu pha chiah si lovin, mi inti tlawmngai chawpte an hmuh avangin tlawmngaihna chu bo ta duakah emaw dal ta riauva hmuhna an nei thin,
tlawmngaihna hi bo ta duak leh tla hniam hrim hrim ni lovin, hun inher danglam angin,a rawng (colour) a rawn inthlak danglam ve hret hret a ni tih a pawmawm mah zawk a ni. Engpawh nise, Khawvel suahsualna leh hmasawnna in zial mup mup karah hian Mizo tena boral kan phal hauh loh tur chu Tlawmngaihna hi a ni. Mizo hnam humhalha a awm a,
YMA a din chhung hi chuan tlawmngaihna hi a bo tak tak chuang lovang.

Leave a Reply