TUMKAU NI, KRAWS KALKAWNG CHU

Marka 11 : 9 “Tin, a hma lama kalte leh a hnung lama rawn zuite chuan, “Hosanna! Lalpa hminga lo kal chu fakin awm rawh se,”

Isua Krista Tumkau Ni a Jerusalem a kal tlang ni khan hmelhriat chi hrang hrang a chhar thar a. Chungte chu tawite in i han chhui ila.

1. Ngaisangtu : Amah ngaisang em em tu mipui, chhawl lo phah a, amah lawmna hla lo sak sak tu te. Rom sawrkar chak tak laka chhandam theitu ni a an ngaih. Ram tana revolutionary movement thlen thei tur khawp a, mi hneh theihna neitu ni a an hriat kha a ni miau a. Chumi piah lamah mipuite a hrai puar a, thilmak tak tak a ti bawk a ni.

Amaherawhchu, Isua ngaisangtute khan a kar leh maiah chuan, “Khengbet rawh” tia au tute kha an ni leh si a nih kha. Lal Isua ngaisangtu nih ah, i duh tawk dawn nge, Kraws thleng rakin Lal Isua i zui ang a, engmah ui then nei lo in, Kraws lerah chuan i va thih chilh ve dawn tih hi Kristian i nih dawn chuan i in zawh hmasak ber tur a ni e. Chu Kraws ler a, va in pumpek loh chuan Krista chhandamna reng a hmuh theih si loh. Mahni duhna chin leh malsawmna duhna chin chauha Lalpa au thintu nih kan duh tawk chuan Isua ngaisangtu nih ah hian kan la lawm tawk tihna a ni ang.

2. Amah hawtute: |halai tawng takin Isua chet dan ei lo tute kha an awm ve tho mai. Pharisai-te leh midangte a zirtirte ho ngawi tura duhtu, an au hla leh chawimawina hla sa ringawt pawh lo tei thei lo em em tute kha an awm ve a ni. A chhan tam tak a awm thei awm e. Isua hnenah ngawi tura, khap tura an han tih khan Isuan hengho hi an au loh chuan lungte an au ang a ti mai anih kha. Isua tan hian, amah hawtu neih hi thil thar a ni hran lo, mi rel leh sawichhiat rawn kha a ni ve hrim hrim. Isuan a hriat chian em em chu amah hawtute ho chhandam tur khan Kraws a la pu dawn a ni tih kha. Amah chawimawi a awm hlau em em, lo duh lo em em tute tan pawh Pathian thu angin a nun a la hlan dawn a ni tih kha a hrechiang em em a ni.

A pawimawh ber chu Isua hawtute zinga mi i ni thin nge? Isua ngaisangtu zinga mi i lo nih ve thin? tih ai chuan Isua Krista kan tana lo kal a hi, i lawmzawng, i hlimna thin aiin i duhin i thlang zawk em. I tana thil tha ber, a aia thlan tur dang awm tawh lo, i engkim ai pawha thlan zawkah i lo nei ve tawh em? Chutiang mi chu amah chawimawi turin Pathian in a zawng mek zel e. Hosanna Lalpa hminga lo kal chawimawitu tur atan nang leh kei hi Pathian in min ko a ni.

Leave a Reply