TUNGE CYMA PRESIDENT?

Pu Vanlalruata, President Central YMA

Central YMA President, Pu Vanlalruata (Vla tia koh) hi kum 1972 December 5 khan Aizawl-ah a lo piang a, a pa hi K. Zothanpara (L) niin, a nu chu Lianhmingthangi a ni. Unau mipa 1 leh Hmeichhe 3 an ni.

Primary leh Middle School chu Tuikual, Aizawl-ah kalin, Cl- VI – XII chu Sainik School Imphal (1983 – 1990) ah a kal a, hemi zawh hian BE (Electrical) chu Lukhdhirji Engineering College, Morbi (Near Rajkot) Saurastra University, Gujarat-ah zovin, kum 1999 – 2009 thleng North Eastern Development Finance Corporation Ltd (NEDFi) ah thawkin Mizoram State a enkawl a. Kum 2009 khan a thawhna NEDFi, Aizawl Branch atangin NEDFi Head Office, Guwahati ah transfer a ni a, amaherawhchu, Central YMA-ah Asst. Secretary- ah thlan a nih avangin, a hna hi chawlhsanin Central YMA lamah hian inpe ta zawk a ni.

Infiamna lamah a tuiin Table Tennis leh Football a khel uar hle a, kum 1987 khan All India Sainik School aiawhin Subrato Mukherjee Football Tournament, New Delhi-ah a khel nghe nghe. Engineer a zir zawh veleh hian YMA-ah inhmang nghalin, kum 1996 khan Section-ah hruaitu niin, kum 1997 atanga 2008 thleng Tuikual South Branch YMA-ah hruaitu a ni. Secretary hna phei chu kum 10 chuang lai a chelh nghe nghe a ni. Kum 1997-1998 khan Central YMA a Youth Centre leh Project Sub-Committee-ah te a tel kawp nghe nghe a, kum 1999- 2008 thleng khan CEC member-ah ruat a niin, 2008-2011 ah Central YMA Asst. Secretary a ni a, 2011-2015 thleng Gen. Secretary atan thlan a ni.

Eizawnna lamah chuan Renewable Energy, a bik takin Solar Energy leh Hydel Project lam a buaipui thin a, tunah hian Hydel Project pakhat (Maintenance Contract) enkawlin, Solar Dawr, Zarkawtah a hawng a. NEDFi-a a thawh chhunga a tawn hriat (Experience) atangin Project Report/Implementation/ Monitoring lamah hma a la tan mek bawk.

Rawngbawlna lamah chuan Tuikual Presbyterian Kohhranah Puitling Sande Sikul Zirtirtu a ni. Kum 2001 khan Pi Lalthanpari nen inneiin fapa 2 an nei a, Tuikual South-ah an khawsa mek.

Leave a Reply