TUNGE I HMING?

– C. Lalbiakmawia

Rethei leh hausa, hmelchhia leh hmeltha, scooty nei leh neilo, zaithiam leh thiam lo, mobile phone changkang nei leh nei lo, mifing leh mi a, mitin ten kan neih vek chu Hming hi ani. A nalh emaw nalh lo emaw, a sei emaw a tawi emaw pawh ni se kan hming hi keimahni min nih tirtu ani a, a pawimawh a, roh tlak ani. Kros lera min tlantu ngei pawh A pian hma hauhin A hming hi sak ani tih kan hria.

I hming bulah em- aw tawpah emaw i hnam hming leh sap hming i dah ani thei. I thu a ni a, tu sawisel theih a ni lo. Mahse ziahdan mumal nei rawh. Eizawnna a i hming ziah dan te, school certificate ah te, voter ID ah te, Ration Card, Driving License etc ah te hian hming thuhmun neih ava tha em!! I hming a sei deuh vangin a lam tawiin ziah mai mai ching lo la, miin an ziah pawh phal suh. Ration card leh Voter ID-a hming ziahdan in an loh vanga Bank account hawng hlei thei lo, veng va hmel deuh hi nitin deuh thaw an awm a ni a.

Mizoram sorkarin Ration Card a siamthar dawn a, document tling anih avangin hming ziahdan-ah fimkhur hun lai ani. Ration buhfai i ei ve ngai lo a ni thei, vawk chaw-ah in ti anih pawhin Ration Card-a i hming ziahdan erawh ngai pawimawh rawh. Electoral Roll ah leh i Voter ID-ah i hming diktak-a ziah anih loh chuan D.C.Officer, Election Branch-ah siam-that tir ta che.

Mak ve deuh mai chu, hnamdang hi an ni ve tho em ka hre law; Hming pum a in koh hi Mizote hian kan duh vak lo teh tlat. Kan hming chu ani si. Chuvangin mi kan inhmelhriat tir dawn in “chumi chu ka/a ni a, chuti chuan min/ an ko thin “ tih na chang hi hnam fing ho chuan an lo hria a lawm maw le. Tin, Hnamdang te hian ‘Engnge i hming?’ an tih laiin Mizote hian “Tunge i hming?” kan ti teh tlat a.

Tin, thil pakhat, hming sign(signature) chung chang hi. Bank-ah chuan ti hian ka sign-a, Office-ah chuan ti hian ka sign ti mai mai, parawn awm hmel pu hi an awm ve chawk bawk. An zahawmna nasa takin an hnukhniam tih an inhre si lo.

Mi pangngai chin in signature an neih hran duah ka hre ngai lo. Rambuai laia Pu Laldenga(L) signature leh C.M. anih hnu a Pu Laldenga(L) signature kha a in ang renga. An sawrkar hmasak laia C.M. Pu Hawla signature leh tun a a signature hi a danglam lova, A.M.C. Chairman Pu C.T. Zakhuma signature hi U.C.O. Bank-a kan pu a nih thin lai a a signature chiah chiah kha a la ni bawk. Pawimawhna neipha chinte hian an hming sign dan(signature) hi an thlak mai mai ngai lo viau.

Thlan thlenga kan chhawm tur leh mi ten kan hmel awmdan an thgeihnghilh vek tawh hnu pawh a kan thlan chunga in tar reng tur chu kan Hming hi anih avangin ngaihlu ila, mi pangngai ni a in hria chuan hming sign dan (signature) thlak
sek lo bawk teh ang u.

Leave a Reply