TUNGE MIFEL?

Heti hian ka ngaihtuah thin. Kan vengah hian tute nge mifel chu ni a, tutu hi nge misual kan tih te chu ni ang le. Ei tun tun chunga inkhawm taima em em te nge, nitin mai a rui thin te hi sual zawk. Fel leh sual inkar hi engtia zau nge ni a, tu nge ramri then fel a, thu tawp siam thei ang le.

Kan khawtlangah mi chi hrang hrang kan leng za a, tlin lohna leh fel lohna nei theuh kan ni. Chuti chung chuan a chhunga chengte hian mifel leh fello mi tha leh tha lo kan thliar fo mai a, hei hi veng inlungrualna leh thawh hona ti chhe vek thei a ni a, kan inennawn fo a tha.

Kan vengchhungah hian veng tana tangkaina neilo tawp chu an awm a rinawm loh, eng emaw kawng tal chuan thil tha kan ti theuh a tangkaina hmun kan nei vek a ni. Zu/Drugs ruih ching pawh lo ni se, tlawmngaihna kawng hrang hrangah te hian a hmahruaitu an ni fo thin. Mahse kan rilru dik loh vang zawng avang hian an thiul tha tih te kan hai der a; an that lohna lai kan hmuh len thin avangin misual chhuahin kan chhuah ta zawk thin a, hei hi a pawi em em mai a, an hma lam hunah thil tha tih zel chakna an neih loh phah thin. Heng ang mite hmusita sual ta viau a ngaitute nunah pawh hian zirtur a tam bik lo thin khawp mai. Chuvang chuan kan zaa kan in enlet tlan chu a hun ta niin a lang.

Kohhran leh khawtlangah kan inhmang a, a lawmawin a ropui a ni. Chutihrual erawh chuan kan nunah tlin lohna tam tak kan nei theuh tho a, khawtlang a awm tha duh lo kan tih fote pawh hian kohhran leh pawl hrang hranga inhmangte hi kan tlin lohna leh fel lohna an hmuh hmaih bik si lova, zu leh drug ruia thle thle ho leh ruih theihthil ti lo mi rel leh an chanchin tha lo lai sawi nuam ti em em maite, mi dangte aia fel leh tha nia inhre tlat mai te chan tur chu thuhmun reng a ni si a.

Kan Pathian thuin ‘Mi dangte hmangaih tura min zirtir’ lai a; thenawmte pawh ngeih thei reng reng lote, mi chhumchhia leh harsa zawkte tanpui a hneha kan hmusit zawk tlat te, mi hnuaihnung deuh zawk ten chhiat an tawha akan kal tha duh tlat lo te, inkhawm peih hle si a, khawhar in leh mitthi lumenna kan kal ngailo te, thalai ni si a thlanlaih leh khawhar in lenpui kan tum miah lo te, mite tlin lohna leh fel lohna sawi zuah zuah a, an nunah entawn tur awm biuk chuang miahlo nih te hi a Kristian lovin a Mizo lova, siamthar lehna kan mamawh a ni.

Mi fel famkim tumah kan awm loh avangin kan thatna laite inhmuhsak thiam ila, dawm kan kan ngaihna zawn theuhah hmangaihna nen inpui tawnin, inlungrualna leh thawh hona tha siam turin ke i pen tlang theuh teh ang u.

Leave a Reply