TUNKAR THIL THLENG LANGSAR ZUALTE

27.12.2020: Covid – 19 hri kai enkawl lai mi 3 chhuahtîr an ni a, mi dang 2 kai thar hmuh a ni.

• Hripui lêng avânga inkhâwm theih ni lo mah se, kum 2020-a Pathianni hnuhnûng ber nî hian Zoram mipuite’n in lamah inkhâwm an buatsaih a; chutih laiin, khaw thenkhatah chuan biak inah kohhran hruaitute kal khâwmin hun an hmang a; tin, biak in thleng thei lote tân mual inkhâwm buatsaihte an awm bawk a, kohhran thenkhat chuan Sunday School kai tha leh Bible chhiar chhuak lâwmman an sem bawk a ni.

• Saitual District, Teikhang Vêngnuama Pu Chîntunpaua in luah lai chu zîng lam dâr 2 vêl khân bungrua eng mah chuh hman lohvin a kâng ral vek a, a in neitu leh a fapa Khamthantluanga-te hian hliam na lutuk lo an tuar.

28.12.2020: Hemi nî chhûn dâr 12:30 vêl khân vai motor chhuk thla lam leh bike chho lam chu Bîlkhawthlîr khaw chhûngah insuin, bike-a chuang Pi Lalramkimi, Vairêngtê Saron Vêng chu a hmunah a boral a, a pasal hi hliam tuarin Kolasib hospital lamah phurh chhoh a ni.

• Covid – 19 hri kai mi 19 chhuahtîr an ni a, hri kai thar mi 8 hmuh belh an ni bawk.

• Chawhma dâr 10:24 khân Thangsuanliana, kum 28; Khawruhlian khua chu an lo vahnaah an thing kihin a delh a, a hmunah hian a boral nghâl.

• Aizâwl leh Champhaiah Excise and Narcotics department-te’n heroin gram 289 leh a neitu nia puh mi 7 an man bawk.

29.12.2020: Covid – 19 hri kai mi 17 chhuahtîr an ni a, mi 9 hmuh belh an ni.

• State Bank of India, Aizawl Branch chuan an din champhaphâk vawi 49-na an lâwm.

• Hemi nî chhûnah Champhai district-a Vapâr khuaa Pu Thangngaihpauva in; chhûngkaw member 4 luah lai, Assam type in chu bungrua eng mah chuh hman lohvin a kâng ral vek.

30.12.2020: Covid – 19 hri kai 3 chhuah an ni a, mi 5 hmuh belh an ni.

• Kolasib Sub-Headquarters YMA-te man khâwm ruihhlo chi hrang hrang chu Synod bookroom kawt, Diakkâwnah hâl ral a ni.

• Hemi zân hian Sêrchhîp police-te chuan Sêrchhîp Bazâra dâwr pakhat atangin hâlpuah leh hâlmawi chi hrang hrang thahnem tak an man.

• Thênzâwl YMA branch hrang hrang tang kawpte’n ruihhlo do beihpui an thlâk mêkah Tlawng kamah zu bilhna eng emaw zât an tichhia.

31.12.2020: Covid – 19 hri kai mi 7 dam taka chhuah an ni a, mi 14 hri kai thar hmuh chhuah an ni.

• 3rd Battalion Assam Rifles Lunglâwn Lungleia inbunte chuan ramrîa an Out Post, Parva-I khuaah meizial zuk that lohna leh a bânsan dan mipui an zirtîr.

• Tlabung leh a chhehvêla YMA branch hrang hrang inzawm khâwmna, Khawthlangtuipui group YMA-in zu leh ruih theih thil dang vaiin an khaw thenawm an fang kual.

• Kum 2020 ni hnuhnûng ber a nih angin kum hlui thlah tûrin mipui an inbuatsaih.

• Halpuah leh halmawi chungchanga Sawrkar leh YMA thuchhuah chuan khawpui lamah zawm a hlawh teh chiamlo.

01.01.2021: Covid – 19 hri kai mi 2 dam taka chhuah an ni a, mi 12 hri kai thar hmuh chhuah an ni.

• Kumthar ni a nih ang in chhungkaw hrang hrang ten mahni in ah hun hman a ni a, kohhran thenkhat Biakin lam a hun hmang an awm bawk. Boruak thalo thleng hriat a nilo.

Leave a Reply