TUNLAI NAUPANG DANGLAM TAWH DAN HI

– H. Thanzawna

Tunlai naupang nun dan han danglam tawh dan hi nu leh pa te hian in ngaihtuah ve thin em? Nu leh pa chauh pawh nilo thalaite pawh hian han chik ve teh u. Pitar deuh leh putar lam deuh te pawh hian han tir ila khawlai a thil la emaw lei emaw, a engapawh nise hlawh nei lo chuan tumah an tirh theih reng reng lo mai hi nu leh pa te hian a bul atanga enkawl dan a fuh loh deuh ni te pawhin ka ring rum rum thin. Tirh dawn a hlawh pek tiam leh an lo haw a lawmman tih ang reng lo pek te hi hmathehah hmangin kan zawngchhangna turin lo tih hmasak a awm thin a ni lo maw?

Mahni tu leh fa te pawh hlawh nei lo chuan an tirh theih ta reng reng lo mai hi an tet te atang hian hrilh leh zirtir deuh an ngai zawng a ni. Hlawh (pawisa) hi an beisei ru ran mai a, han pek loh chuan a leh pekah han tir dawn ila an tirh theih tawh loh, an ngeng ngalh mai a. Tun atanga zirtir dan leh vawn dan hi nu leh pa te hian I ngaihtuah chiang the ang u. Lo thang lian zel tur te hian tur reng emaw tiin an rawn copy chho ang a, nakin lawkah chuan kan ram leh hnam zia hi a chhe zawngin a kal vaih chuan nu leh pa te bawk hi a pawi ti tur leh a mualpho tur tih hriat sa a ni. Thuawih deuh leh tirh nuam deuh chu khawimaw laiah chuan lo awm pawh nise chung ho pawh chu an hliah khuh vek tihna a ni a, an naupan lai thunun an nawm lai hian nu leh pa ten fate zilh hauh leh thunun tum hram hram a va tha em.

An lo leikan deuh lahin ven leh enkawl hman lovin School an kal loh leh khawlaiah infiam inkhelin an hmanhlel leh tawh si a. Fa tha thuawih nei duh chuan an tet lai, thunun an awl lai hian thunun rawh. An awm ang ang, an nundan ang ang a en hian an thatna pakhatmah a siam lo tih hria ang che. I fa, i nau, i tunu, tupa tun atang hian naupang fel leh tha, thuawih ni turin enkawlin thunun tha la, nakin zela nangma tan pawh a tha, rilru tihlimtu a la ni ang.

Tin, Chawlhni zingah chawei puarin inkhawm turin an chhuak a, Sunday School thawhlawm bakah hmawmsawm leina a hranin an duh a, kawng lakah an lei a an ei leh a, In-ah chaw kawpuarin an ei lo em ni ? Hei pawh hi chin dan tha lo tak a ni, sim daihah a tha, in senso thlawnna mai mai a ni.

He thu hi a zawm thei thei kan awm tak hlauhin ka han tarlang ve a ni e. Naupang tirh hnial veng nih aiin thuawih vengah i siam ang u.

Leave a Reply