U SAWMA KHA…..

– C. Lalrammuana
Finance Secretary
NYMA

Kei aia ziak thiam tur leh ziak awm zawk tam tak an awm tih chu ka hre thova, hruaitu hlui zawk te cho chhuah ve nan han ziah ve hrim hrim hi atul in ka hria a, mihlim tawng takin eng emaw hian min mawlh ve deuh a hriatna ka dawng ve te pawh a ni mahna. Hriat chin beitham hle mahse, kan thlasik mau puah ve phawng mai teh ang, tun min sel bik em lovang chu maw! iti mah mah han ti sela, min tawmpuitu an awm meuh chuan ka ring bawk silo. Thenkhat rilru ah chuan ani chu a awm viau sin ti a ka ngaihdan min tawmpuitu hi an tam leh zawk fe chuan ka ring bawk si a. Damlai a han inchawimawi hi mi tamtak chuan kan harsat viau thin a, tul pawh kan tilo maithei, han infak chiam ila uchuak nih te pawh kan hlawh leh thung maithei bawk.

A ni zawng siamtu hian mibik ah alo siam a, a damlai a a sulhnu kan chhui mek lai hian a mawilo zawnga a sulhnu han chhuikir tur hian ka rilru leh ngaihtuahna hi ka seng phal ngang lova, tungchho va kal, siamtu in alo duan hian famkim lohna khawvel ah hian famkimna nun a nei bik lo tawp ang le! mahse, a sulhnu han chhuikir hian he khawtlang hian a famkim lohna hi kan va hre silo em? Midang tana a nun hman hian tu pawi nge a sawi ang a, tunge lawm lo awm ang le, a hre tu chu he khawtlang mipuite hi kan ni si. Kan tuar hi a na kan ti a, kan tuar thiam mawlh lova, kan chhungril nun hi ana ngawih ngawih chu a ni ber mai. Sawitur tam tak tak a awm a, chulam chu duhtawk phawt ila.

Kan hriatrengna turte han sawi leh ila. Nursery veng kan indan atanga hruaitu ni reng thin, a thihni thlenga Branch Executive Member ni bawk, YMA hnatlan nikhua a sulsutu, thlanlaih nikhua a hma taka thlanmual pana ruahmanna siam zung zung thin, kuang duan nikhua a athiamna kan chhawr fo, pa kawm nuam leh hlim thei naupang zawk te huikhawm thiam tak a ni. Nursery veng Arsi lian Pu R.C. Sawma kan han chan ta mai hi amak in tuar thiam a har kan ti tlang ngei mai. Hospitala aluh dawn ni thleng pawn hlim tak khan kan la inbe thei kha a ni si a. Khawtlang, chhungkua in kan la mamawh vei nen. Chunglam rorel hi hriatthiam ahar a, a hmanhmawh mah mah deuh lo mawle ka ti, a thleng miau mai bawk si.

Hrileng vangin nikum lamah YMA day te kan lawm thei tawh lova, kumin pawh hi kan lawm thei leh dawnlo ni te pawn a hriat deuh reuh a, YMA day te han lawm thei ta ila tih te ka ngaihtuah a, kan Hruaitu kalta U Sawma tel lova Day han lawm chu a member puite hian kan chak kher hian ka ringlo. YMA day ni ah microphone han hum leh chat sela, phur tak, awki zang khai takin member te han au kual leh sela, kan va hlim leh dawn tak em! Tiang tur kha a awm tawh dawn silo, a hmunruak hi azau a ni. Amah ah hian zirtur tha tak tak min hnutchhiah teuh hian ka hria a, a tlawmngaihna te, midang te a kawmnel zung zung thei hi a ropuina tizual tu a ni. U Sawma bulah khan mi rel ahar viau mai a, an chanchin thalo zawng sawi hi hriattur a tlem khawp ang. A bul ah reilote pawh awm ila, kan nui ho nghal thei deuh zel mai a, fiamthu han zeh mai tur te a hre em em te kha a bula awm ti nuam zual tu a ni.

Thlanlaih na a U Sawma a awm tawh chuan thalai ten hah/ning hmel pu hi an awm ngai mang lo ti ila kan sawi uar lutuk lo in ka ring a, min pawmpuitu pawh YMA member zingah an tam zawk ngei in ka ring, a ni ang hi kan veng Nu chhul atang hian an chhuak leh tawh kher lo maithei a sin. U Sawma kha thusawi thiam taka mi rilru han hneh chi erawh a ni lo mai thei e, a ni chuan a a nun chhungril a taka a tih lan thin avangin mi tlawmngai, mi khawngaihna ngah, tanpuingaite tan a pa nih tling a ni thung. Kan chan hi alian a, kan tuar a, kan la tuar zel dawn zawng ani e.

I sulhnu chhui in kan hun leh ni te kan chhiar ang a, kan hmuh changin mittui a far fo ang a,rilru a na thar leh thut thut thin bawk ang a, nang erawh chu hrehawm reng reng awm tawh lohna hmunah Pa angchhung nuam ah chuan ileng ta si. Ngai a au in chiau vawng vawng mah i la kir zai i rel si lo, Mangtha tih mai chauh kan theih tawk a ni e.

Mangtha le…….

Leave a Reply