UPA TE I NGAI HLU ANG U

Upate Ni ni 01.10.2021 chu kan hmang liam tawh a, a ni pel tawh mahse kan thinlungah erawh upa te ni hi cham chhunzawm zel teh se.

Mihring kum bi chhiar danah panlai, vanglai, upat hun te hi hun chhinchhiah tlak leh pawimawh a ni. Kum upa han tih hian eng chin nge tih erawh thliar thiam a har, chutihrualin kan hrethiam viau thung si. Vanglai hun ten mual a liam a, vanglai huna an thil tawn leh tih thin te chu tunlai atan chuan thing a lo ni tawh a, pasaltha leh huaisen, sa lu la tam thei ten ngaihsan an hlawh tawh heklo. An thatlai hun zawng a mite sa beng ni thin ten lawm an hlawh tawh miau lova, then leh rual ten mual an liamsan hnuah khawharna nun neiin, an vanglaia an chanchhin sawipui tur an zawng ruai thin.

An hma lam hunah beiseina tur an nei tawh lova, an tan hringnun hi niawm mai a ni tawh zawk, duattu an mamawh em em laiin duat an hlawh tawk silo, hmangaihtu an ngaih ngawih laiin hmangaih an hlawh tawk hek lo. Khawvel hmasawnna leh changkanna te hi an tan chuan ninawm mai a ni a, mi tam tak tana hlimna hi an tan chuan hlimna a tling ve tawh lo, an khawharna leh lungngaihna avangin thih ngawt theih a ni chuang silo. Hei hi a ni upate hringnun chu.

Mizote hi upate zahlo tak hnam kan ni em ka hrelo, mahse mita kan hmuh leh kan hriat tam tak hi chu hrelo in hmulo law law ila a tha zawk mai thei. Mahni nu leh pa te zahlo taka an khum thin te, kut hial thlak duh te kan awm ta tlat mai, zahlo takin kan tawngkhum a, ka hau a, ka hmusit thin. Hei hi kan tan anchhia a ni dawn. Malsawmnain a rauhsan ngei ngei thin. Upate zahlohna chhungkua chu chungkaw hlim a ni ngai heklo. Hnam fing a piangin upate an zahin an enkawl tha a, an chawimawi thiam.

Mitin mai hi upat hmabak kan ni, reilote emaw kan tih chhung hian kum a kal duak duak a, kan vanglai hun hi a reilo teh a nia. Upate chunga kan khawsak duh dan ang chiah hi kan hmabak a ni tih kan hriat a tha hle. Upa zawk te zah lo, mahni nu leh pa ngei pawh zah lova an thu ngai duhlo chuan zah a phu bik lo. Tuna kan khawsak dan chiah chiah hi kan tu leh fate kan chunga an khawsak dan tur a nih avangin i nu leh pa, upa zawkte chungah zahna lantir rawh. Upate hi kan hnam rohlu an ni si a.

Leave a Reply