VAI MISTIRI HLAWH CHUNGCHANGAH EMERGENCY MEETING NEI

Central YMA chuan Vai (hnamdang) Mistiri leh Helper hlawh a bituk thar chungchangah sawi neuh neuh a awm avangin Aizawl City Branch YMA President leh Secretary (an remchan loh chuan O/B atangin aiawh 2 tal) Emergency Meeting ni 9.5.2011 (Thawhtan) zan dar 7:00 khan CYMA Hall-ah a kova. Branch hrang hrang atangin member 205 chuang an kalkhawm a ni.Resolution hranpa siam a ni lova, sawitu hrang hrangte thusawi tlangpui kan lo hriat ve atan tarlang ila.

1. Vai (hnamdang) Mistiri leh Helper hlawh bithliah chungchang :
* Central Coordination Committee (CCC) leh Central YMA Executive Committee (CEC)-in zir chiangtu tura an ruatte zir chian atanga Mizo hnam tana tha tur nia hriaa an lo bithliah tawh hi ti danglam thei kan ni em ni? A hlawhtlin theih nan theihtawp chhuah hi kan mawhphurhna a ni mai lawm ni…?
* State/Ramdang ah pawh khawtual mi leh sate hlawh leh state pawn leh ramdang mite hlawh a in ang ngai lo.
* YMA hian a kuang lo a nawr ngai lova, Mizoram leh hnam tana tha tur leh hmasawnna tur nia a hriatah hma ala mai thin a ni.* Hnam dang hlawh bithliah pawh hi YMA Kumpuan ‘Khawtlang nun siamthat’ huang chhunga mi vek a ni.
* He hlawh bi thar hi a hlawhtlin theih nan Kohhrantin (Local Church) te pawh an hmunpui kal tlangin ngen nise.
* CYMA ruahman anga thawk duh lote chu rawih loh ngam nise, chutiangin a ruaitu lam pawh hetiang zawm duh lo chu Branch-ten en dan thiam mai nise.
* Mizo Mistiri Assn leh FOMTU lam pawh an thiltih ennawn leh tura ngen nise.

2. Bank lem chungchang :
* CYMA chuan Study Group insiamin RBI Pawmpui loh Fin. Institution hrang hrang (eg: NEREFS, Zawlbuk Real Estate, Vanso Technocraft, etc) te zir chian an ni a. Zawlbuk RE leh Vanso Tech te phei chu Office hmuh tur pawh a awm tawh lovin anmahni pawh Manipur thlengin zawn an ni a, hmuh tur an awm tawh lo a ni. RBI atanga phalna nei anga insawi, Interest rate, RBI bituk aia sang tak a pe te pawh chhui zui zel an ni. Hetianga hausak thut duhna lak atang hian Mizo mipui te fimkhur turin CYMA chuan a ngen tak meuh meuh a ni.
* NEREFS in loan a pek turte Loan dilna Form-ah Branch YMA President hriatpuina leh an rulh that loh pawha hmalakpui tura intiamna sign tur awm chu CYMA hriatpui loh a ni a, Branch-te fimkhur tura ngen an ni.

3. Kumpuan hmalakna :
* YMA Kumpuan ‘Khawtlang nun siamthat’ hmalakna zinga mi, CADS hmalakna (ruihhlo do kawngah) hrang hrang tarlan a ni.
* CADS in an kalkawnga a lo awm a nih loh chuan Zu chu an luhchilh lutuk rih lo. No 4, Drugs, Ganja etc-te erawh chu a theih ang anga luhchilha chhui zui zel a ni.
* CADS ten ruihhlo avanga an mi man, thuneitute hnena an hlan thin chu thla 2/1 hnu lekah man nawn leh tur an awm fo avangin Police/Excise lamah pe tawh lovin hmun dang/centre, ani lo berah pawh thla 9 tal awm ngaihna, a tul chuan kum 1 leh a chanve thlenga awm theihnaah an thawn tawh zawk.
* He centre-ah hian tunah mi 450 vel an awm tawh. An Biak In, riahna a chep hle, lamtualah an leng lova, an pheikhawk, sleeper pawh chhuata dahna awm loh vangin Ditipah an rawlh zel. An hmunhma zauh nan CYMA chuan Rs. 50,000/- an pe.
* CADS hmalakna tanpui duh Branch leh mimal tan pek theih reng a ni. Mahni kalchhuah a har, sum leh paia tang thei an awm chuan CYMA in a dawng thei reng a ni.
* Branch YMA, MHIP, MUP, Kohhran, Kohhran hmeichhia, KTP/TKP, Local Council etc – a tanpui thei apiang tan tanpui tlak an ni e.

Leave a Reply