VANRAM-AH IN TAWNG LEH ANG AW….

– B. Lalmalsawma (M-Section)

“Parting is such a sweet sorrow
I shall say goodnight till it be ‘morrow”

tia Romeo-a’n Juliet-i a mangtha dan ang deuha inthenna sweet sorrow riau te hi a awm ve a!
Mihring te hi nung turin kan lo piang a, chu nunna chuan inthenna a ken tel avangin mi nung leh mi nung kan inthen a, mi nungin mitthi kan then bawk a. Mihring hi mihrang theuh kan nih avangin a hun leh a hmun a zir te leh kan mi then a zir tein kan nun a khawih dan chu a dang khawp ang le..

Kan inhmu leh dawn a ni tih beiseina nena kan thlakhlelh em em te kan then hian a hun laiin hrehawm viau mahse nakin hun tur te ngaihtuahin kan la hlim thei viau tho thin. Amaherawhchu, he khawvela kan hmangaihte thihna avanga kan then hian a dan a dangin a lehpek vak hi awmin a lang lo, Kristian kan nihna angin hmuh leh beiseina chu a awm tehmeuh mai..! Mahse chu beiseina chuan intawn lehna turin kawngka hran, THIH hnu piah lam ram a lo hawn tak avangin thlamuanna nei turin rinna hranpa neih a lo ngai a..

Chu rinna nei tan pawh thlamuanna famkim nei tur chuan Vanram-ah a kai ang em? Kai lo ta se, kan inhmu leh dawn tawh lo tihna..? Hremhmuna chatuana kal em chu ka ngai ngam bawk si lo.. Zawhna hlirin ngaihtuahnaah kan luangliam a, a chhang theitu awmchhun bakin a chhan theih thil a ni bawk si lo! Amaherawhchu, kan hmangaih kal ta ten Vanram-ah min lo nghak ngei a ni tih Pathian thutiam rinna atanga kan inthlamuan theih chuan a sweet sorrow (??) te pawh a la tih theih awm e..

Engpawhnise, dam chhunga inhmu leh tawh lo tura inkalsanna leh inthenna hrim hrim aia hrehawm zawk chu an tel lova nun chhoh zel hi a ni. Ka mamawh apianga ka tluk luhna leh mawi leh mawilo zawng lova ka luanliam theihna tur awm ta lo te chuan tawrhna nasa tak min pe a. Loh theih lohna avanga tawt tuna hun ka hman thinna te chuan ka nun ram a ti chau hluah hluah a. Ka va’n ngai thin tak em! Engvang khera kan la mamawh em em lai taka min kalsan nge maw a nih le tiin huattur ber haw ngam si lovin engkim maihi ka haw hluah hluah a! A hnukchah hma, a harhfim laia thil awm thei hrang hrang a han chhut kual velin a kalna tur lama a kal hreh vang ni hauh lovin a kalsan turte a kalsan hreh vang zawkin a theih chen chen tiin kan tan theihtawp chhuahin a tang fan fan reng a. Mahse siamtu remruatna kal mek chu pumpelh theih bik hek lo le, amah aia thlamuanna leh malsawmna thlen theitu zawkin min awmpui dawn a ni tih hre reng chungin thlamuang takin min kalsan ta a..

Ani chu lungawi tak leh thlamuang takin a kal ta tih hriatna avanga thlamuanna karah pawh chuan khawharna leh lunglenna boruak chuan min la tuam hneh em avangin ngaihtuahna a chawmawlh a, lung a leng a ni..! Mahse, piantirh ata min kalsan ngai lotu leh amah avanga nungdam kan nihna Pathian chuan tun hi hun lawmawm a ni tih min hriat nawn tir a.. Tawrhna phenah hian malsawmna a awm thin tih ngaihtuah theihna rilru fim min pe a. Thinlung lungchhe tak kar atang chuan kan thiantha kal ta te avanga ka lo luan liam pui tawh thin, The Guardian hla, “See u in heaven..” tih behchhanin ka han tawngtai ta ngawt a.Chu tawngtaina tawngkam chu tawi hle mahse vawiin thlenga ka nun kal zel atana tawngtaina pawimawh tak ni chhovin, ka chak lohva ka chakna a lo nih theihnan ka rinchhan Pathian chuan ka thutiam hlen turin nitinin min ti chak chho mek zel a.. Amah Pathian nena kan lendun reng loh chuan lunglen khawharna avangin sual lamah ka peng thei a ni tih a hriatchian em avangin loh theihlohna avang tal pawha amah nena kan lendun zel theihnan a tihngaihna ka hriatloh harsatna hmang tein mal min sawm a; tichuan, amah ko lo theilo leh au lo theilo dinhmunah bawk ka lo ding leh thin a ni.
A damlai chu sawi loh, a thihhnu pawha amah avanga Pathian malsawmna tam tak ka dawn zel dan te ka ngaihtuah a… Ka ngaih thinzia te lo hrilh thin tawh mah ila, tawngka felfai taka ka hmangaihzia ka lo la hrilh miah lo tih ka’n hriatchhuah chuan hun kal tawh hnu hnuh kir leh theih hi ka va han chak thin tak em..! Ka piantirh ata vawin thlenga a hmangaihna avanga malsawmna ka dawn ngaihtuah phei hi chuan….

I wish that I had one more chance to say I love you one more time,
and even though I know I can, I’ll say it in heaven.
I’ll see you in heaven . .

tiin “See you in heaven” ngaithla chung zelin Pathian rinchhanin thu tlukna ka siam ta a!!

Leave a Reply