WORLD AIDS DAY 2021

Thupui: “Intluk tlan lohna, AIDS leh Hripui te lo tawp vek tawh rawh se”

Khawvel pum huapa HIV darh zel tur venna leh a vei mek te’n inenkawlna tha an dawn theihna tur te, AIDS avanga nun chanta te sunna lantirna atana ni pual bik ‘World AIDS Day’ December ni 1 chu kan lo thleng leh ta reng mai a, he mi ni pual denchhen hian Mizoram State AIDS Control Society chuan mipuite chibai a buk a ni.

Kum 1988 atanga hman tan World AIDS Day hi keini mizote tan hian a pawimawh lehzual em em a, a chhan chu India rama state tin a mihring cheng zat mil zela chhutin HIV kai tamna ber state kan nih vang a ni a, HIV kai pung zel hian engnge a nghawng dawn tih han tarlang lawk ila, hetiangin:-

1. Tihdam theih loh natna a ni: Khawvel pumpui ah hripui a leng mek a, Mizoram pawhin kan tuar nasa khawp mai. Hripui leng mek Covid-19 hi hlauhawm hle mahse a dam leh thei a, kan ramah pawh hian covid kai dam leh mi sang chuang an awm a ni. Mahse, HIV chu kai tawh chuan a dam thei tawh lo a, kan ramah hian dam chhunga HIV hrik pai ni reng tur mi sing chuang an awm tawh a ni.

Heng HIV hrik pai te hian inenkawlna ngun takin an dawn reng a ngai a, HIV hrik inthlalh pung chak lutuk tur venna leh natna kaihhnawih awm thei laka veng tur ART damdawi te hi nitin khel lo in a hun ngai chat chat ah an ei a ngai a, chutiang a an ei zat zat loh chuan an damdawi ei khan an taksa ah hna a thawk lo ang a, HIV kaihhnawih natna hlauhawm taka tak an nei thuai mai dawn a ni.

2. Thalaite nun suattu a ni: HIV hi thalaite natna ti ila kan sawi sual tam lutuk awm lo ve. Kan rama HIV kai hriatchian 25080 zinga za zela sawmriat chuang zet chu thalai kum 15 atanga kum 45 in kar te an ni a.

Kan hriat theuh angin, kan ramah hian ruihhlo leh zu avangin kum 40 hnuailam abikin mipa fa kan chan nasa em em a, thlanmual tin hi kal ta ila, thalai ruihhlo leh zu kaihhnawih natna avanga mual liam ta thalai tam zia chu sawi tam pawh a ngai awm lo ve. Hemi belhchhah turin hun eng emaw chen atang khan kan thalai zingah sex atanga HIV kai hmuhchhuah an tam em em bawk a.

Hetiang zel a kan kal chuan nakin lawkah chuan chhungkua, khawtlang ah thalai an tlem hle dawn a ni. Africa khawmualah AIDS avangin thalai an thi nasa lutuk a, khaw then khatah phei chuan tar leh fahrah naupang deuh chauh an awm ti a kan ral sawi thin kha keini ram hian kan hlat vak lo a ni.

3. Hnam suat thei natna a ni: HIV chu thalaite natna a ni kan tih tawh angin Mizoram a HIV hrik pai kan hmuhchhuah zawng zawng zinga za zel a sawmriat chuang chu thalaite an ni tih kan tarlang tawh a. Mihring nun ah chuan thalaite chu nu pa a insiam a, fanau te nei a, inthlah pung zel tur kan ni a, kan Pathian thu ah pawh fanau malsawmna hi malsawmna tehna lian tak a ni.

Amaherawhchu, kan ramah HIV avanga nun chan thalai kan tam zel chuan kan hnam tlem te hian pun lam kan pan dawn lo a ni. Chu chuan eng nge a nghawng tak ang le? Mizoram ah hian a neitu mizote hi kan la tlem hle dawn a ni. Ram leh hnam humhalh tih te kan tupui a, chim ral te kan hlauh viau lai hian, kan chhut tel ngai em em chu ruihhlo leh zu avanga nun chan thalai tam lutuk te, sex lama nun thianghlim leh vawng tha tawk lo thalai HIV kai an tam lutuk leh an pung zel hi kan ngaihthah chuan he ral hlauhawm tak, thawm nei ring mang si lo hian hnam mang na ala thlen mai dawn a ni.

Kan hnam tlu chhe mek, sex leh ruihhlo, zu avanga thalaite sualin an taksa, rilru leh thlarau a tihhlum ruih ruih mekte chhanchhuak tur hian zoram kristian inti te hian Pathian lam i hawi tak tak teh ang u. He thlarau indona rapthlak takah hian hnehna kan chan dawn chuan Bible a Lalpa mi huaisen te tih ang hian Pathian rinchhanna tak tak, Lalpa chenchilhna leh Pathian thlarau chakna nen ngawt lo chuan kan do hi kan hneh lo chu a nih hi maw. Haw u, Lalpa lam i hawi ang u, “in thinlung tak taka mi zawn hunah chuan mi hmu ang a ti si a”-Jeremia 29:13.

4. Retheihna thlen thei leh Mahni ram ngeia hnam dangte thuhnuaia min dah thei natna a ni: Tarlan tawh angin HIV kai tam ber te chu thalaite an ni a, chhungkua, khawtlang leh ramin hma a sawn dawn chuan thalaite hi kut ke pawimawh tak mai an ni a. Rilru leh tha chak thalaite rim taka hnathawk nei chhungkua chuan hma an sawn ngei ngei angin, ram pawhin chutianga thalai chak leh hrisel, hnathawk mi a ngah chuan reilote ah ram intodelh leh changkang an lo ni mai thin a ni.

Mahse kan ramah ve thung chuan thalai ruihhlo leh zu avanga hrisel lo, chak lo, hna rum thawh chu sawi loh enkawl ngai ngawih ngawih hmel an tam zia chu a rama chengte hian kan hrechiang hle awm e. Tichuan chung belhchhah tur chuan taksa a natna do tute ti chhe thei, kai tawh chuan tih dam thei tawh bawk si loh, natna hrang hrang kai chhuak teuh a, mihring hrisel lo leh chak lo taka siam thin HIV hrik pai thalai a sing tel kan nei bawk a. Chu a chhapah India rama cancer vei tamna ber state kan la hauh tel bawk a.

Tichuan kan hrisel lohna leh dam lohna te enkawl tur hian kan neih zawng zawng kan hmang ral a, in leh lo ram tih ral te pawh a ngai hial fo. Nakin lawkah chuan kan inhmun te hi kan state thenawm Manipur atanga lo lut te, Myanmar atanga lo lut te, Cachar mi in mizo hminga an lei te ala ni fur mai dawn a ni. Mahni ram ngeiah hian hrisel lo, rethei bawk si mizote hian mahni ta sawi tur nei mang lo in kan la awm thei mai dawn a ni.

Tlangkawmna: HIV kaina tam ber hi sex leh ruihhlo tih atangin a nih avangin he natna darh zel tur venna kawnga hmalakna te hi mi tam takin kan ngai thiam lo fo thin a, mahse kai hlauhawm a awm ve lo te kan inhnial a, kan in tauh bur bur lai hian kan thalaite chuan an lo kai zawih zawih thung lawi si. A tha lo zawng hi chu a duhawm loh ve em bawk a, thu dik leh thil thleng mek te hi pawm thiam a har em thin a, mahse tui put pawh a put a ni tih kan pawm phawt loh chuan a put zel tur dan a har thin angin kan hnam, kan khawtlang nun pawh hi a dam lo a ni tih hi pawm phawt loh chuan siam that lam kan pan thei dawn lo a ni.

World AIDS Day ah hian HIV darh zel tura hmalakna ti chak tu nge kan nih a, a ti thuanawptu zawk? A tihdam tu kan nih em loh pawhin a tihdam hna ti chhe tu nih loh hram hi a va pawimawh em. Mimal, pawl hrang hrang hmalak duh dan leh hmalak theih dan kawng a in ang lo ang, mahse pawl hrang hrang hmalak dan leh kalphung theuh te kan in pui bawm vek thei lo emaw kan ril rem zawng a nih chiah loh pawhin, in zah tawn sak thiamin, taksa pum khata peng hrang hrang hnathawh a in ang vek lo mahse an zavai hian taksa pumkhat ami an ni vek ang hian awm thiam ve ila chuan kan ram, kan hnam tlu chhe nasa lutuk tur leh harsatna namen lo kan tawh tur hi kan su kiang tlang theiin a rinawm.

Leave a Reply