YMA Central Coordination Committee Thurel

YMA hnuaia General Conference tih lohva rorelna sang ber, Central Co-ordination Committee chu September 12, 2018 khan Central YMA Hall Tuikhuatlang, Aizawlah an thu khawm a. He hunah hian kumin YMA Rorel Inkhawm neih tura rel tura thu lutte ngaihtuahin an thlifim a ni. Rorel Inkhawma ngaihtuah tur zingah hian Mizo hmeichhia, hnam dang pasal neite tribal an nihna hlihsak theihna tur dan chungchang pawh a tel.

CCC meeting-ah hian member 181 kalin Pu Vanlalruata, President, CYMA in a kaihruai a. General Secretary-in April 11, 2018-a CCC Meeting leh tun meeting inkarah YMA hmalakna hrang hrang report a pe bawk. October 19, 2018-a Vanapa Hall-a 2nd YMA Rorel Inkhawm awm tura thu rel tur (agenda) atana chhawp chhuah hrang hrangte thli fimin sorkar khawih huanga rel tur atan, “Mizo hmeichhiaten hnam dang pasal (Tribal-in Non-Tribal) an neihin Schedule Tribe status hlihsakna tur, ‘Social Custom Bill’ Mizoram Legislative Assembly-a pass a nih theih nan Central YMA-in hma la rawh se,” tih pawh a tel a ni. Heng bakah hian sorkar khawih huangah hian “National Register of Citizens (NRC) hi Mizoramah kalpui ve ni rawh se” tih leh “Champhai – Tahan (Myanmar) Bus Service-tir turin sorkarin hma la rawh se” tih chu a tel bawk a ni.

Kumpuan atana rawtna lut zingah tuna kumpuana hman mek, “Ram leh Hnam Humhalh” tih bakah “Zirna Uar” tih leh “Ruihhlo Do” tih chu Rorel Inkhawma chhawp chhuah turin an pawm bawk a ni.

ROREL INKHAWM AGENDA TURTE:
YMA KHAWIH:
1. Mizoram Kohhran hrang hrang ten ram leh hnam humhalhna kawngah thawhhona leh inpumkhatna tha zawk an neih theih nan Central YMA-in hma la rawh se.

2. Thingtlang lama zirna a lo that zawk theih nan Central YMA-in hmalak ni rawh se.

3. Mizo hnam incheina hi Patent tura hma lak ni rawh se.

4. Mizo tawng humhalh kawngah Central YMA-in hma la rawh se.

5. Zu leh Ruihhlo do kawngah tun aia nasa leh chak zawka Branch tinten hma kan lak theih nan Central YMA-in hma la rawh se.

6. Sawrkar atanga Development fund hna thawh (i.e. Link Roads, BADP, NEDP and other constructions) hi 70% tala hna thawh a nih theih nan Central YMA-in hma la rawh se.

7. Ration Buhfai leh Gas mipui ten buk dik leh tling a kan lak theih nan Central YMA in chak zawk leh rualkhai zawk in hma la rawh se.

SAWRKAR KHAWIH:
1. Mizo hmeichhiaten hnam dang pasal (Tribal-in Non Tribal ) an neihin, Schedule Tribe Status hlihsakna tur “SocialCustom Bill” Mizoram Legislative Assembly-a pass a nih theih nan Central YMA-in hma la rawh se.

2. National Register of Citizens (NRC) hi Mizoramah kalpui ve ni rawh se.

3. Champhai – Tahan (Myanmar) Bus Service-tir turin sorkarin hma la rawh se.

KUMPUAN: Hengte hi chhawp chhuah tura pawm a ni –
1. Zirna Uar
2. Ruihhlo Do
3. Ram leh Hnam Humhalh

YMA General Conference kal tlang kher lova CEC bawhzui tura dahte :
1. Central YMA hnuaia thiam thil zirna training hrang hrang neih thinte hi Sub-Hqrs. YMA huamchhungah neih ve zel thin ni rawh se.

2. MLPC Act hnuaia Liqour Card hi a neitu chauhin a hman theihna tura dan zam turin Central YMA kaltlangin Sawrkar-ah thlen ni rawh se.

3. Hnamdang Sponsorship chungchangah a ram leilungfa (Mizo) chauhin an sponsor theih nan Central YMA-in hma la rawh se.

4. Needle Syringe exchange programme (NSEP) kalpui mek dan hi ennawn ni rawh se.

Pu Fabian Lalfakawma, Finance Secretary, Central YMA hnen atangin kum 2018-2019 Central YMA Budget ruahmanna ngaithlak a ni a, ruahmanna hi Rorel Inkhawm ni 19th October, 2018-ah pharh atan pawm a ni.

CYMA Rorel Inkhawm Agenda atana kan Branch in kan rawt – ‘National Register of Citizens (NRC) hi Mizoramah kalpui ve ni rawh se’ tih leh Kumpuan atan ‘Ram leh Hnam Humhalh’ tih kan rawt chu ngaihtuah tur atana chhawp chhuah zingah a tel a, Branch YMA chuan lawmawm a ti takzet a ni.

Leave a Reply