YMA CHANCHIN LEH THILTUM

Young Mizo Association (YMA) chu “Politics rawngkai lo, tlawmngai pawl” a ni a, “TANPUI NGAITE TANPUI” tih chu a thuvawn ber a ni.

YMA hi June 15, 1935 khan Kristian Missionaries te leh Mizo Kristian hmasa te khan an lo din a. Khang hunlai vel khan Mizoramah kristianna in nasa takin hma a sawn chak a, Zirna Sikul leh Biakin te a lo pung chho ve hret hret a. Mizo nunzia pawh a lo danglam a, Mizo hnam nun a hmun pawimawh tak luahtu Zawlbuk meuh pawh a lo chuai ta a.

He Zawlbuk zet hi chu Sap Missionary te leh British India sorkar official te meuhte pawh khan a pawimawh na an hmu ve a, khawtlang tana a thawh hlawkzia an hria a, khatih laia Governor pawhin Zawlbuk chawhnun lehdan a ngaihtuah hial a ni, mahse, nunphung a lo danglam tawh si.

Hengte a nih avang hian Kristian Missionary te leh Kohhran hruaitute khan Mizo hnam tana zirna Inpui, Ralven buk, kawng engkima Mizo hnam nun innghahna tih theih ZAWLBUK lo tawpta hmun ruak luah khat lehtu tur neih kha a tul takzet tih an hria a.

Ni 3 June, 1935 khan Kristian Missonary Pi Zaii (Miss Katie Hughes) chenna Inah Zawlbuk hmun ruak hnawhkhattu tur Pawl din chungchang ngaihtuah a ni a “YOUNG MIZO KRISTIAN ASSOCIATION” tih chu pawl hming atana chhawpchhuah langsar tak a ni a. Mahse, Zorema Pa (Rev. David Edward) rawtna “YOUNG LUSHAI ASSOCIATION” tih chu a tha berah an pawm ta a, tichuan June Ni 15, 1935-ah khan hnathawk theiin YLA an lo din ta a.

India zalenna neih 1947 hnu khan Mizoramah thil danglam nasa tak a thleng ve zel a, Lushai tih aiin Mizo tih chu a tha tawh zawka ngaihna a awm a. Tichuan 7th October, 1947 khan “Young Lushai Association” tih chu “Young Mizo Association” tiin thlak a lo ni ta a ni.

YMA chuan thiltum leh a dinchhante:
1. Hunawl hman that.
2. Zofate hmasawnna ngaihtuah.
3. Kristian nundan tha ngaihsan.

“Tanpui ngaite tanpui” tih thuvawn a neitu YMA hian nasa takin Mizo mipuite leh Mizoram tan hna a thawk tawh a, chawimawina pawh a lo dawng nual tawh a ni. Hruaitute inthlak ve thinin, Mizia leh tumdan, duhdan inanglo tak tak te pawh hruaitu lo ni thin tawh mahse, YMA chu a la ngai renga, Mizo mipuite leh Mizoram tan tun thlengin a la ding zel a ni.

Leave a Reply