YMA CHANCHINBU ENKAWL DAN ZIRHONA NEIH A NI

Central YMA leh I&PR Department buatsaih YMA Chanchinbu Enkawl Dan Zir hona (Media Workshop 2020) chu ni 06.02.2020 (Ningani) nileng khan Central YMA Hall ah neih a ni. He hun hi Deputy Chief Minister, Pu Tawnluia’n khual lian niin a hmanpui a, I&PR Director Pi Lallianpuii chu khual zahawm a ni.

Media Workshop hi hun hnih ah then a ni a, thawhkhatna hi Dr. Malsawmliana, Assistant Secretary, CYMA chuan a kaihruai a, Pu J. Lalsangliana, Chairman, CYMA Literature Sub-Committee chuan hunserh a hmang a ni. Pu C. Laldinliana, Secretary CYMA Literature Sub-Committee chuan inhmelhriattirna leh report a pe a, inlawmna thu Pu Vanlalruata, President CYMA hnen atangin ngaihthlak a ni bawk.

Khuallian, Pu Tawnluia Deputy Chief Miniter leh khual zahawm Pi Lallianpuii, Director I&PR department hnen atangin thu tha tak ngaihthlak a ni a, Nl. K. Lalthlamuankimi hnen atangin zai mawi tak ngaihthlak a ni. Pu Romawia Pachuau, Editor CYMA Chanchinbu hnen atangin thupui ‘YMA Chanchinbu enkawl dan’ ngaihthlak chhunzawm a ni.

Thawhhnihna hi Pu J. Lalsangliana, Chairman CYMA Literature Sub-Committee chuan a kaihruaia, Nl. Liandailovi hnen atangin zai mawi tak ngaihthlak a ni. Tv. Lalmuanpuia Khiangte leh Tv. Lalnunfela Hlondo hnen atangin ‘Chanchinbu kalphung bihchianna leh zirhona’ Power Point Presentation hmanga zirho a ni a, Pu Noel Lalchhuanmawia, Assistant Secretary, CYMA Literature Sub-Committee chuan a kal te zawng zawng hnen ah Participation Certificate semna a nei a, Pu Lalnuntluanga Tlawmte, Vice Chairman, CYMA Literature Sub-Committee chuan lawmthu sawina neiin hun tih tawp a ni.

Central YMA hian I&PR Department nen a tangdunin kum 1999 atang khan Media Workshop hi an buatsaih tan a, Vawi 15 Media Workshop hi buatsaih tawhin I&PR Department nen tangdun hian vawi 13 an buatsaihna a ni. Media Workshop ah hian Aizawl khawchhung YMA Branch 83 leh Aizawl khawpui pawn YMA Branch 58 atangin YMA chanchinbu editorial board member thahnem tak an tel a ni.

Leave a Reply