YMA DAY THLIRLET A NI

Tahrik ni 27.6.2011(Thawhtanni) zan khan Bungkawn YMA Office-ah Bungkawn, Nursery Veng leh Bungkawn Vengthar Branch Hruaitu (OB) ten kumin 2011 YMA Day a huhova Nursery Veng Basket Ball Court-a kan hman chungchang an thlirho a, Branch pathum hruaitu an kan tha hle.

He hunah hian kan Branch hruaitu Pu R. Lalhmangaiha, President; Pu Zokunga, Secretary leh Tv. Lalrinzuala Chawngthu, Asst. Secretary te an kal a, hruaitu dangte erawh chhungkaw thil pawimawh leh tul dang, loh theih loh avangin an pha.

Branch pathum hruaitute hian kumin YMA Day hmanho chu beisei bak aia YMA member-ten kan hlut avangin hlawhtling an ti hle a, zawngchhang tlak tak niin an hria. A thlengtu Nursery Veng Branch inbuatsaihna fakawm an tih thu te, YMA member mai bakah vengchhung mipui leh nunau chenin an hlut chu fakawm an tih thu te sawi chhuah a ni.

YMA Day hmanho tuma Branch hrang hrang aiawha mawhphurtu leh chanvo neiten an tihhlawhtlin deuh vek avanga lawmawm an tih thu te, inunauna leh inhmelhriatna tha zawk veng pathuma YMA member-ten an neih phah an rin thu te, thalaiten ruihhlo kalsana infiamna an uar chhoh an beisei thu te, kha mi nia zu leh ruihtheih thil ruih buai avanga buaina leh nungchang mawi lo engmah hmuh tur awm lo chu thil chhuanawm tak leh YMA kumpuan “Khawtlang Nun Siamthat” nen pawha thil inhmeh tak a nih thu te leh YMA member-te hawiher san tawhzia lan chhuahna thil chhinchhiah tlak tak a nih thu te an sawi bawk.

Branch pathum atanga hnam lam mawi taka entir a ni te, Nursery Veng bikah YMA Chhangten mawi taka hnam lam an entir te chu hnam lam chawinun zelna kawngah thil tha tak a nih thu te, infiamna hrang hrangah mahni Branch tana tang tak si a infiam mi nih anga nungchang mawi tak lantira mawi lo khawpa tang si lo member-te fakawm an tih thu te sawi lan a ni bawk.

Chhuak hmasa lama tarlan tawh angin kumin YMA Day kha kan veng Basket Ball Court-ah Bungkawn, Nursery Veng leh Bungkawn Vengthar Branch-ten a huhovin kan hmangho a, khuain min bumro zauh mah se, harsatna lian tham engmah awm lovin kan hmang thei a nih kha. Kan Branch hruaitute leh member, khami nia kal zawng zawng chuan hlimawm kan tiin zawngchhang tlak kan ti vek ang a, kum tin tih theih ni lo mah se a khat tawka kan tih zauh zauh theih pawh a beiseiawm hle a ni. Amaherawh chu, kan Branch YMA-in kan chanvo hrang hrang tha taka kan tihhlawhtlin theih kaia chanvo pakhat, malzai kan tihhlawhtlin theih ta loh avang khan he meeting-ah hian kan Branch hruaitute chuan thupha an chawi thung.

Joint Meeting tan hma hian Meeting neihna hmunah hian tlai dar 6:00 velah zanriah tui tak eiho a ni bawk.

Leave a Reply