YMA DAY THUCHAH

– C. Lalchhanhima
President, NYMA

June ni 15, 2021, YMA Day vawi 86-na kan lo thleng leh dawn ta . Kan Day vawi 86-naah hian YMA Member zawng zawng te duhsakna chibai ka buk a che u.

Khawvel Sawrkar ropui leh chak pawhin an do hneh hleih theih loh leh kan cho rual loh Hripui ( Covid 19 ) lengin, keini State pawh min luhchhuah ve avangin nunphung a khaihlak a, ei leh bar zawnna kawng thlengin harsatna namen lo kan tawk a. He hrileng avanga harsatna kan tawh zawng zawngte hi a tawngtu leh a hmachhawntu kan nih theuh avangin sawi chhuah vek kher a tul awm lo e. Hetiang anih avang hian kum 2020-ah pawh YMA Day kan hmang thei lo tawh bawk kha a ni a. Kumin 2021-ah chuan hrileng pawn min kiansan anga, Pathian zarah nunphung pangngaiah kan let leh thei tawh ang chu ti a beiseina nen kan thlir mek laiin, a zualzapui vaihlenhlo tih ang maiin rin phak baka nasain hri-in min man a. Nitin hri kai tlakhniam a hnekin kan pung zel mai si a, hri avanga nunna chan pawh mi 60 kan chuang ta hial mai.

YMA Member ten kan nghahhlelh em em YMA Day kan hlimna ni, midang tana kan luanchhuah ni, tanpui ngaite tanpuia kan pen chhuah ni,kan nunna atana hlu leh pawimawh thing kan phunna ni, thil tha tam tak tih nana kan hman thin hi kum dang angin hmang theilo mah ila, kan theih chin chinah kan thupui ‘Tanpui ngaite tanpuitu’ kan nihna hre reng a, tlawmngaihna leh rinawmna nun ze mawi vawng nung zel turin kan inchah thar leh a ni.

YMA-in kumpuan thupui ‘ Zirna uar’ pawh hrileng avangin hma a lak theih meuh lo a. Zirna In pawh pangngai taka hawn theih a ni lo a. Amaherawhchu, kan rah chin atanga hmasawn zel turin kan ngaihtuahna te chawl lo se, Zirlaite pawhin kan Sawrkar leh Zirtirtute hmalakna ngai pawimawh a, online class a ni emaw, mahni tal pawha thiamna tak tak pawchhuak thei turin thahnemngai zual sauh sauh ang u. Kum 2020-2021 a Zirlai hlawhtling zawng zawng te thinlung takin kan lawmpui tak zet che u a. HSLC Exam a Mizoram puma pathumna hauhtu R.Lalpekhlui D/o Lalsawmliana Renthlei (L), Nursery veng chi al liak kan nei hi kan chhuangin kan lawmpui a, kan veng a chawimawiin, Nursery Veng nih a tinuam hle mai, a kal leh zelna turah duhsakna kan hlan e. Tin, kan veng chhung a Sikul- CLS Academy ten Result tha tak an nei hi an chhuanawmin, veng a timawi a, lawmawm kan ti hle. Zirtirtute leh Zirlai zawng zawng te lawmpuina leh duhsakna chibai kan buk bawk a ni. Hetih lai hian, Zirlai hlawhtling ve ta lo te pawh hnual mai lova thahnemngai lehzual a, hlawhtling ngei tura tan la sauh sauh turin kan fuihin kan ngen bawk che u a ni.

Kum 2022 kan Branch din cham Silver Jubilee (kum 25- na) lo thleng tur atana Sub-Committee hrang hrangte inbuatsaihna pawh hripui avanga hma lak theih a ni rih lo, a mangan thlak hle a ni. Engpawhnise, hma lam hun beiseina nen Pathian rawn chungin i thlir phawt mai ang u.

YMA, chi leh hnam karah emaw, hausa leh rethei emaw pawh thliar lo a, khawtlang thatna tura thawktu, tanpuitu, nihna chu entawntlak taka nunpui zel turin, Member zawng zawng te chibai ka buk che u in, duhsakna ka hlan mawlh mawlh a che u.

YMA vul zel rawh se.

Leave a Reply