YMA GENERAL CONFERENCE 2019

– Ricky R.F. Mawia, M-Section

YMA General Conference 2019, N. Vanlaiphai a neih zawh tak chu nuam ti tak leh hlim takin kan han tem ve chu a ni a, thuziak mi ka nilo tih leh kei aia ziak awm tak tak an awm tih te hre reng mah ila, chung ka insitna zawng zawng chuan min pawt bet zo mang silo a, ka Laptop chhe ve tawh tak la chhuak chuan kan type ve rawih mai a ni.

Keini Nursery Veng Branch pawh hruaitute an tang tlang bawk a Branch YMA President berin veng chhung thalaite tlawmngai a Conference kal turin zan khaw tai rek reka a zawnna rah chhuah ni ngei turin kan veng atang pawhin Bus pahnih leh Car engemawzat N. Vanlaiphai lam panin kan liam chho ta kha a ni a, kan Local Council Chairman Pu Dara ho na hnuaiah Conference kal te kan hlim in kan haw hlawk hle bawk, Central YMA Finance Secretary Pu Roneihthanga kan han neita te hi tuilet hnua a vawikhatna, kan veng tana mellung pawimawh tak a va ni teh reng em.

Ni 15 ( Thawhleh Ni) zing dar 6:30 velah Pu Zohminga nen kan Branch President Pu Chhanmama kan va sawm phei ta kha a ni a, a ni ho a kan hmanhmawh teh reng nen Pu Dara (Local Council Chairman) kan kalpui tur ber lah a lo la thleng ve thei mang silo a, Pi Mahruaii thingpui lum tui tak kan han in hnu pawhin a lo la thleng thei bawk silo kan lirthei chuan na tur kan han in her rem hnu chuan a lo thleng ta chhurh chhurh mai ‘chaw ka ei phawt a’ an ti leh nghal phei kha chuh! Pu Chhanmana khan a back-kick mai ang tih hlauhawm tak a ni. Kan thingpui in lai a kan rel nasat zia kha hria sela chuan min kalpui lo chiang ngawt ang, tichuan kan in khalh chhuak ve ta a, Zampuimanga Lungphun ah Pu Jka (Pu Ri-a tih dan tak ah Pu Jammu & Kashmir-a) te, Pu Nunkima te ho nen kan han in nghak khawm a, Pu Ro-a te pawh Bolero ah tawt em em in an lo thleng ve bawk tichuan zun ram te kan thiar zawhin Israel-mi te’n Kanaan ram an pan ang mai in N. Vanlaiphai chu kan pan ding ta zar zar mai a ni.

Tluang takin Conference na hmun tur N. Vanlaiphai khua chu tlai lam dar 4:00 velah kan thleng a, ka vawikhat kalna a ni bawka a va nuam em, an kawnpui ber ‘Sanpoh’ kawn ah kan han dinga Counter No-3 ah kan han in report-a kan hotute’n kan thlenna tur an han tih fel hnu chuan thlen in lam panin kan han in khalh phei leh a, thlenin te phuhruk nan kan President leh Local Council Chairman te’n chawhmeh bawlhlo engemawzah an han lei phawt a, hmangchang hria ka va ti em! thangthar te’n i entawn zel ang u, anni zarah kan mi pangngai hawi ve thei a ka va lawm si em.

Zanriah tui tak kan thlenin Pu Lalthlangliana te’n min buatsaih sak a mikhual te chunga an fel dan leh min duhsak na te kha Pathian in tam takin malsawm rawh se. Zanah inkhawm turin kan han in khalh chhuak leh a, thlen zan atanga Conference chhung zawng Pu Jka, damlohna avanga a mu ta char char erawh a khawngaih thlakawm tak zet, Pu Nunkima leh Tv. Mavena ate ai ngawt chuan an nu awm ve se a duat thiam deuh tur.

Kei pawh kan hotute zuiin pandal lam leh khaw chhung fangin kan han in khalh chhuak ve leh a, an kawn lian ber leh ropui ber sanpoh kawnah chuan duty te hnenah khawilai nge in kawn lian ber, in kawnpui lai ber khawilai nge? tiin ka zawt a, awi awi awi, ka va zak em!! Pu Dara pawh a zak ve tho, a chhanna kan dawn chu, hei hi kan kawn lunlai ber, rum taka tih a ni.

Conference chhung zawngin ka inkhawm kim a, kan hotute hnung zuiin an zarah thil thar leh thu tha tak tak ka hriat belh bawk a ka va hlawk si em. An veng kawn lian ber ‘Sanpoh’ tih awmzia hi mak leh danglam tak a ni. A hre chiang chak in awm chuan kan Local Council Chairman Pu Dara hi in zawt dawn nia. Thenzawl Nula leh la lo te nen a an hlim zia leh a luck zia kha an nu hriat loh in a sawi duh mahna.

YMA leh Kristianna inkungkaih thuk zia hi Kum 1935 June ni 3-a inhmu khawmte atang ringawt pawh hian a lang chiang viau awm e. Hemi zan hian mi pawimawh leh challang tak tak kohhran a khaipa te’n Pi Zaii Bangla-ah inhmu khawmin pawl din an rel ta kha a ni a. YMA hming hmasa ‘Young Lushai Association’ tih phuahtu pawh Zosap Rev. David Edward (Zorema pa) a ni a. Tichuan Kum 1947 khan YLA tih chu YMA ti a thlak a lo nita a, tlawmngaihna leh Kristian nun dan tha chawinung tu pawl lian ber hi, mi tam takin pawn lam atanga kan lo ral thlir na ‘Kristianna hi kohhran ta, Mizo-na hi YMA ta’ ang deuh a ngaihna hi a din tirh a kan mi hmasa te rilru tawmpui hi chuan a ni thei zan lo hian a hriat a ni. Hei erawh hre thar zel ila YMA ah mi an lo tel a an lo ta neih theihna turin hruaitute hian mawh an phur lian hle ani tih hriat tel erawh a fuh zel awm e.

He pawl ah hian kohhran hrang nih avanga in sitna te, dinhmun in chenlohna avanga in diriamna ang chi hi a va awm lo si em, chutiang khawp a pawl lian leh ropui Zofa tawh phawt tana ngaih ngam taka kan tel theihna YMA hi a par mawi thliaktu nilo a, chawm leh enkawltu nih i tum zel ang u.

Kan sawi hmaih palh ang tih hlauhawm tak Nursery Veng Branch YMA zaipawl mawlh mai kha an va zaithiam si em, hmangaih berte lenna Nursery Veng ngaih a va na thin em? Tiro u maw, Pu Henry-a & Pu Adina Conference tawp zanah mipui muthlu kaiharh thei, haw mai tum te pawh pandal lama ke pen tir leh thei an ni tlat, an zaithiam, an zai tha hle mai tih a tawp mai lo in khatianga zai tura kan hruaitute, member-te leh Conductor te in pekna leh kan mi senior te thahnemngaihna luangliam kha zoram mipui te’n an lo thlir in an lo dawng thei ta zawk a ni.

Khawtlang leh kohhran nghet taka phuar khawm tu pawl lian ber YMA hi ral thlir mai lo in a panna lai leh chhawm dawl a ngaihna apiangah tan la zel ila, veng nuam leh lungrual siam turin Nursery Veng YMA vul zel rawh se.

Leave a Reply