YMA GENERAL CONFERENCE 2021

Central YMA hmingin chibai ka buk a che. Covid-19 hrileng vangin YMA General Conference vawi 73-na Dt. 19-21.10.2021 chhunga Bilkhawthlira neih tur chu a hun takah kan nei thei dawn lova, Dt. 24.8.2021-a Central YMA Executive Committee meeting chuan, kumin 2021 chhhung ngei hian nei tura inbuatsaihna kalpui ni se a ti a. YMA General Conference 2021 chungchanga hriat tur pawimawh te chu;

1. Kum 2021 General Conference hi Central YMA hruaitu 2021-2023 chhung ami turte thlan hun a ni a. YMA Dan Bu Bung V, chang 26-na in a tarlan angin, Hruaitu atana rawt (Nomination) nei duhte chuan, hruaitu atana kan duhte (anmahni remtihna lain) rawt (Nominate) theih an ni a. Sub- Hqrs/Group leh Aizawl khawpui Branch atanga rawt (Nominate) nei duhte chuan September, 2021 ral hma ngeiin Central YMA Office-ah Nomination hi thehluh nise.
Nominate neih theih zat :-
1. Sub-Hqrs. YMA – Mi 3 aia tamlo
2. Group YMA – Mi 2 aia tamlo
3. Aizawl City Branch YMA – Mi 1 aia tamlo
4. CEC – Mi 5 aia tamlo

2. General Conference 2021 atana Agenda leh Kumpuan rawtna thehluh tur neite chuan September, 2021 ral hma ngeiin Central YMA Office-ah thehluh tur a ni. YMA DANBU LEH CHHIATNI THATNI KAIHHRUAINA ennawn rawtna thehluh theih a ni ang. YMA Danbu-in a sawi angin Sub-Hqrs. leh Group huamchhunga Branch te chuan, Group leh Sub-Hqrs. kaltlangin Agenda leh Kumpuan rawtna hi thehluh tur a ni a. Sub-Hqrs. Leh Group atanga Agenda leh Kumpuan rawtna lutte chu Central Coordination Committee-ah thlitfim tur a ni ang. Aizawl khawpui chhung Branch atanga Agenda leh Kumpuan rawtna lo lut te chu CCC meeting-a chhawpchhuah turin Central Executive Committee-in a thlifim hmasa ang.

3. YMA General Conference 2023 thlen dil duhte chuan YMA General Conference Rorelna-a ngaihtuah hman tura dilna thehlut tura ngen leh hriattir kan ni e.

4. General Conference-ah hian kan member boral ta te sunna hun hman a ni leh dawn a. Sunna hunah hian member sun tur kan neih chuan September, 2021 ral hma in Central YMA Office-ah thehlut turin kan inngen a ni.

5. Hruaitu hlun chawimawina dawng turte chu September, 2021 aia tlai lovah thehluh nise, a dawng turte chu General Conference-ah hian kal ngei turin kan inngen a, kal remchang lote chuan aiawh tal tirh nise.

6. General Conference-ah hian Ramngaw leh Nungcha humhalh tha 2021, Kumpuan bawhzui tha 2021 leh Tuihna humhalh tha 2021 Group leh Branch-te hnenah lawmman hlan a ni leh dawn a, Report Form kan rawn thawnte hi September, 2021 ral hma ngeia Central YMA Office a thehluh tur a ni e.

Heng kan rawn tarlante hi a hun ruat chhung hian Central YMA Office-ah thehlut ngei turin kan inngen a ni. Heng Nomination, Agenda, Kumpuan rawtna, Conference thlen dilna, Member boral report, Hruaituhlun Chawimawina dawng tur report te hi lehkha hrang veka rawn thehluh tur a ni e.

I thawhpui,
Prof. LALNUNTLUANGA
General Secretary,
Central YMA.

Leave a Reply