YMA GENERAL CONFERENCE THLENGTU INBUATSAIHNA IN A VAWRTAWP A THLENG TA

October 15 – 17, 2019 a hman tur 72nd YMA General Conference thlengtu tur N. Vanlaiphai khua inbuatsaihna chuan a vawrtawp a thleng chho mêk ta a. 72nd YMA General Conference Organising Committee leh an hnuaia Committee peng hrang hrangte chuan anmahni hmazawn theuh a hna pawimawhte an thawk chho mawlh mawlh zel a. A hun a thlen huna tha taka an hna an hlenchhuah ngei theih nân an theih tawka tha in ruahmanna pawh an duang uluk tlâng hle a ni.

Conference hmanna hmun tur Pandal hi August 20, 2019 khan sak tan a ni a. Pandal hi a dung 150 fts, a vâng 120 fts a zau a sak a ni a. A structure leh a chung rangva hi Central YMA ta a ni a. A structure sak/remkhawm leh a chung chih hi X Deco Enterprise, Aizawl ten contract in an thawk a. A bâk zawng hi mipuiin hnatlangin an thawk a ni.

Contractor te thawh bâk thawk hian mipuite hi September thla laihawl atang khan an hnatlang tan a. Pandal Committee te ruahmannain, N. Vanlaiphai khaw chhunga YMA Branch ramri inthendan zulzuiin mipuite an in hnatlan chhawk a, a hnu lamah YMA Branch ramri zulzui tho a inthenin, hna chanpual insemin an thawk leh a ni. Zan lamah te pawh hnatlangin, zanah hian a cheimawi (decoration) lam leh thutthleng rem hna te an thawk thin a ni. Pandal sa hian khaw thenawm, Bawktlang, Chekawn, Lungchhuan, Lungkawlh leh Sailulak ten hnatlangin an pui a. Sub-Headquarters YMA, Serchhip atangin mi eng emaw zatin hnatlangin an pui bawk. Tin, Tuichangral South Group YMA hnuaia YMA Branch hrang hrang ten sum leh paiin Pandal sak an pui bawk a ni.

Pandal chhehvêlah hian office hrang hrang leh Central YMA in phalna a pek sumdawng thenkhat sumdawnna in eng emaw zat te, thlalak phochhuahna in (exhibition house) leh Legal Cell te awareness campaign neihna tur in te sak a ni a. Office hrang hrang awm turte chu Information Office, Reception office, Medical office te leh Central YMA office leh Sub-Headquarters YMA tin te office te a ni.

N. Vanlaiphai a chhungkaw tinte chu YMA General Con- ference an thlen turah hian an inbuatsaih nasa hle a. An in leh lo te an theih dan dana chei tha in, chhungkaw eng emaw zat chuan mikhual riahna tur room te an siam belh a, inthiarna te pawh siam belh in, mikhual thahnem tak pawh thleng se, dawl zo turin an inbuatsaih nasa hle. Tin, ei leh in lam pawh an inbuatsaih nasa a, chhungkaw eng emaw zatin vawk talh tur an vulh a, ar talh tur pawh an vulh thahnem hle. Buhfai hi sawrkar in Conference a mi tur quintal thahnem tak a pechhuak tawh a. Tui pawh PHED leh Water and Sanitation Committee lamin hnianghnar taka hman tur a awm theih nân ruahmanna tha tak an duang fel tawh a ni.

N. Vanlaiphai mipuite chuan Conference ah hian a tam thei ang ber lokal turin Mizoram chhung leh pawna YMA member te an sàwm a ni. A sakhming “CHHURBURA RUN” ah siang ang lawi theuh ang u.

Leave a Reply