YMA HI A THA A NI…..!!!!!!

– Zokunga (JKA), Ex-President, NYMA

Mahni chanchin sawi zut zut hi mi tamtakin ngaihthlak nuam an ti lo tih hre reng mah ila, sawi a tul hun hi a awm ve bawk thin a ni tih kan inhriatthiam pui pawh a ngai ve fo mai. Chauh chang, chak loh chang, tluk leh ding awn fawm reng rengin kum 15 chuang zet Pathian khawngaihna a zarah NYMA hruaitu zingah ka lo tel ve ta reng mai a. Kha’ng kum kalta, ka chhangchhiat vanglai tak te a YMA a ka lo tel ve te, mi chi hrang hrang mizia leh ngaihdan in ang lo tak tak ka lo thawhpui thin te, Pu President Pa Zova, Pu Rova leh U Hmaa te ka lo hrawn te khan lung a tileng a, nghilh ni a awm dawn mawlh lo anih hi maw! Eizawnna in a zir mawlh tak si lovah chuan lungleng khawhar takin ka YMA unaute che vel ka lo thlir a ngai dawn ta phawt mai chu anih awm hi maw.

YMA a tlem a tha ka lo thawh ve hlekna atanga mi tamtak ngaihdan ka hmuh chu YMA hmalakna a tel hi tha leh zung, sum leh pai senralna ang a ngai kan awm fur mai. Miin chutiang ngaihdan a neih tlat chuan lo sawisel vak theih pawh a ni lo maithei. Mahse, kei leh ka chhungte dinhmun atanga ka thlir chuan YMA tana tha leh zung seng ve thei dinhmun a din hi a hlu a, a hlawkna kan dawn zo zai hi sum a lei theih pawh a ni lo. Kan Branch YMA hruaitu ten kei teh lul leh ka nupui fanau te hming an han hria te, an duh hun a kan In a thingpui an han lam te hi ka va ngai hlu tak em!

Kum 10 chuang zet kal ta a Branch YMA Secretary ka nih chhoh lai khan lehkha min sem pui tura ka nupui fanau te ka tirh thin lai khan an hahna lam aiin an vanneihna lam kha ka changchawi a, phur takin min pui thin. A chhan chu mi tam takin an hmelhriat ve loh Branch YMA Executive Committee Member chin thiau kha tlangnel takin an kawm pha ve tlat a ni. YMA hi lo awm ta lo se kei ni chhung tehlul hian heng mite hi kan hmelhriat pha hauh dawn lo tih ka hria a, kei ber pawh hian Pa Zova (Upa K.Zova) hi kawm chu sawi loh, biak pawh ka be pha lo nasa khawp ang le. Mahse, YMA avangin Pa Zova meuh pawh ka bulah hnuhhnaihin a awm a, kan nui dun bawk bawk a, kan phak tawkin kan YMA dun ve em em ringawt mai a ni. Kan In a chawhlui min rawn kilpui fotu LC Chairman meuh ni thei Lalpu-a (Pa Dara), Pu Ri-a, YMA Puia, etc. te mawlh hi an va hlu tak em! Heng mite pawh hi YMA zara ka thiantha te an ni.

Tuna (2019) a kan Branch YMA hruaitu Pu Chhanmama, Achhuana, Chimtea, U Biaka, Dr. Rka & Unaupa Zohminga te ho kan han nei te hi a va lawmawm em! An chetna khawtlang leh Kohhranah pawh mi entawn tlak, hruaitu tling thiauin Nursery Veng BranchYMA min hruai dawn a ni a, a thlamuan thlak hle mai. Mahse, an kova mawhphurhna pawimawh tak nghattu YMA Member-te hian kan phatsan thiang lo a ni. Mitthi lumen zan, kuang siam, thlan laih, khawhar in lenpui, YMA hminga hnatlan, etc.-ah an duh vang emaw an khelh vang emaw ni hauh lova hruaitu atana thlangtu te hian kan phatsan a thiang lova, kan khawtlang, kan ram leh hnam hmangaihna avang pawhin an hmalakna kawng tinrengah kan thlawp tlatin kan thawhpui fan fan tur a ni.

YMA thil tum leh a dinchhan te, a nihna te hi vawi tam sermon tham a ni. Mahse, tun hunah chuan a Thuvawn “YMA chu tanpui ngaite tanpuitu a ni” tih chauh hi tlem te in sawi a chakawm riau. YMA tana mahni phak ang tawka ke pen chhuak tura ka in buatsaih lai khan “|anpui ngaite tanpuitu” tih atang hian ka qualify lo nghal tih ka hriat chian em avangin ka tuina leh phurna te a bo duak mai. Mahse, ka rilru ang pu mi kan lo nih fur a, mahni tlin lohna hlir kan thlir thup chuan YMA a kal thei dawn lo tih ka hmu thiam ve ruak ruak a. Tling lo leh chak lo tak chungin YMA tana ke pen chhuah ve kha a tul in ka hre lui ve tlat a ni.

Mahnia mite tanpui thei tur a chakna nei hauh lo pawh khan YMA kaltlangin mite tan malsawmna kan lo ni thei ve te hi a hlu a ni. YMA tak hi chu a va tha em!

Hruaitu ka nih ve chhung khan mi tam takin min beisei anga thil tihsak loh ka nei ngei ang a, mi pawisawi pawh ka nei pheng phung ang. Mahse, ka thil lo tih ve zawng zawng te kha ka phak ang tawkah YMA tan a ti ka ni a. Ka lawm ve veng veng mai anih ber hi a. Ka fapa naupang berin an School a “i pa in enge a thawh” tih an zawh tum a “Finance & Accounts Service Officer a nia” ti lova “Y-M-A” ti a a lo chhan ang kha ni phak tak tak phei ila chuan thlamuang takin ka lei hringnun hi ka zawh zo dawn a ni tih te hi ka ngaihtuah ta fo mai.

He Khawvel ka khualzinna ramah hian YMA avanga malsawmna ka dawn zozai te hi ka chhiar seng mawlh lova, chhungkhat laina ka neih hauh lohna veng Nursery Vengah pawh min hmangaihtu thiantha, chhung khat laina te ai pawh a min hmangaih tu, chhiatni/thatni a ka bul hnai tak a awm reng thin KA LEI PATHIAN heti zozai ka neih te hi khawi dang atang mah a ka hmuh an ni lo, YMA atanga ka dawn te an ni. Kei leh ka chhungte tan hi chuan “YMA hi a tha a ni” tih hi mahni tanghma sial tak chung pawhin kan sawi nawn awn awn a ngai dawn anih hi.

Heng Y.M.A a ka thawhpuite hi khawi atanga lo kal nge an nih tiin min bia a nih chuan, an ni ho hi Y.M.A zara Lalpan min pek ka unau, ka thian, ka thawhpuite an ni.

YMA hi a tha a ni…!!!

Leave a Reply