YMA HRUAITU THA

– Vanlalruata,
President CYMA
(YMA Rorel Inkhawma a thusawi)

YMA Rorel Inkhawm vawi 2-na a lo thlen hian Mizo zawng zawng tena YMA hlutzia hre thar leh tlang theuh ila, Pathianin a missionary-te kaltlanga Mizo fate ro min pekah chuan a hlu ber pawl YMA hi kum 83 thla 4 leh ni 4 a lo tling ta der mai a, a lawmawm tak zet a ni. Mizo mipui tan hian a lo hlu tawh thin hle a, a hlut zual zel nan chuan tuna hruaitute hian tan kan lak thar zel hi a pawimawh khawp mai. Chhiatni leh |hatni a kan mizo tlawmngaihna leh mizo nunze mawi kan chhawm nung thin te, YMA hmalakna tam tak zingah kan khawtlang nun ti chhe mektu, Ruihhlo kan do hram hram te, faina leh thianghlimna kan kalpui thin te, phutlet nei miah lova a mamawh apiang tana Thisen kan pe thin te, mipui chanvo buhfai leh gas a bo thlau tur kan venpui hram hram thin te hi a hlu in ram dangah hian kan hnathawh ang thawk ve hi an tam vak hian ka ring lo.

Tin, Kumpuana kan hman mek ‘Ram leh Hnam Humhalh’ hi a hautak hle mai a, sawiseltu pawh kan tawk fo mai a, heng thil a lo thlen chang hian tangkai taka hmangin inenfiah nan hmang hlauh thin ang u. Hetianga kan thawk rim hle chung pawhin kan ram chuan tun dinhmun hi kan thleng tawk a ni a, thawk lo phei ila chu kan ram dinhmun hi ngaihtuah ngam pawh a ni awm love. Chuvangin, hruaitu kan nih chuan tawrh inhuam ve a ngai a, hruaitu tha chuan a kalna tur kawng tha takin a zawh mai thin a ni. YMA hi a lo pawimawh ta hle mai a, he YMA pawimawhna leh hlutna chhawm nungtu member 4,27,393 leh hruaitu (YMA OB) 5,142 hian tun hma zawng aiin kan mawhphurhna a sang zual ta tih hre rengin, hruaitu azirin kan khawtlang nun thlengin a nghawng tih kan rilruah I pai reng thin ang u.

Khawtlang mai bakah, sorkar hmalakna pawh loh theih lohah YMA kan inrawlh ve a tulna a tam ta hle. YMA hruaitu taima lo tan chuan phunna tur a tam ting a ni mai. Hunawl ringawtin a daih ta lova, tlawmngaihna tak tak nei lo tan chuan chhuanlam siam tur a tam duh khawpin a lang. YMA hruaitu hna hi phur thut chang chauhva kalpui hluai chi a ni lo, ‘tei rei peih mi a ni tur a ni’ tih hi a tak taka kan vawn thar a tul zual tak meuh meuh a ni. Tin, hruaitute hi inlungrual that a pawimawh zual hle, inkawm ngeih, lungrual leh lang tlang taka thawhho a tangkai hle, chutiang a nih loh chuan YMA leh khawtlangin a tuar vat thin. YMA hruaitu, political party awn lam nei a, lo tang fal kan awm ve a thiang lo, zu leh ruihtheih thila fihlim lo phei chu inthiar fihlim mai kha a finthlak ber ang. YMA ti baltu lo awm ve hi kan phal lo bur a ni. Lo vah nana kan hmanrua chem leh tuthlawh berte a bil tlat si chuan kan hna sawt hlawl lo ang hian, YMA hruaitu tha, dik, rinawm leh taima ni theuh turin kan inngenin kan in sawm nawn leh e.

YMA vul zel rawh se.

Leave a Reply